Los veteranos del Uviéu y del Sporting recuperen el derbi asturianu

El Palaciu Deportes de Xixón va acoyer mañana, a les 20.45 hores, el debut del Uviéu y del Sporting de veteranos na Lliga Fertiberia de fútbol-indoor. D’esta forma, los aficionaos asturianos van poder revivir aquellos derbis emocionantes en Primera.
 
Pese a que esta competición lleva disputándose dellos años cola participación de los nueve equipos campeones de Lliga, nesta edición amplióse l’abanicu de clubes colos 20 meyores según la clasificación histórica y los roxiblancos y azules nun quixeron perderse la oportunidá de disfrutar d’esta modalidá que se carauteriza por xugase baxo techu, con porteríes grandes y un recintu zarráu por paredes, similar al del hockey patinos. D’esta forma, el balón nunca sal fuera, dando-y al xuegu un dinamismu grande. El tiempu de duración del partíu ye de 60 minutos, dividíos en dos partes de 30.
 
El calendariu quinxo que’l partíu debut de los equipos asturianos fuera’l Uviéu-Sporting, choque que va celébrase en Xixón pese a que’l calendariu marca que los azules son los llocales. Esto ye asina pola falta d’entendimientu ente la organización y el Conceyu d’Uviéu, dalgo que nun prestó un res a l’afición uviedina. La convocatoria del Sporting nesti primer choque ta compuesta polos porteros Sergio Sánchez y Ramón; y los xugadores de campu Tati, Nikiforov, Abelardo, Tomás, Fredi, Míner, Manolo y Rubén Blaya. Mentes, la del Uviéu conoceráse güei.
 
El preciu del partíu, que va ser televisáu en direutu pola cadena 13TV, ye de 5 euros, 8 si s’opta pol abonu qu’inclúi tamién el Sporting-Deportivo del 25 de febreru. El Sporting y l’Uviéu tan encuadraos nel mesmu grupu que’l Celta, Deportivo y Valladolid, y llucharán por algamar les dos places que dan pasu a la fase siguiente de la Lliga.