Los Verdes-Grupo Verde nun pue presentase a les eleiciones del 20-P pol boicó d’un afiliáu

La quinta formación más votada n’Asturies nes xenerales pasaes con 1.727 votos, Los Verdes-Grupo Verde (LV-GV), nun va poder presentase a les eleiciones del 20-P. El partíu denunció a ún de los sos afiliaos por boicotiar la candidatura.
 
La denuncia foi puesta nel Xulgáu de Guardia de Xixón pola apropiación “de numberoses fueyes con avales, amás de documentación del partíu”, lo qu’impidió a LV-GV, organización que formó parte de la coalición Unidá, a alcanzar la cifra mínima de firmes que demanda la nueva Llei Orgánica de Réximen Eleutoral Xeneral (LOREG). Esti conflictu lleva los ecoloxistes a calificar de “inxusta” a esta llei "que punxo un filtru p’aquellos partíos que nun tienen subvenciones públiques y que vien a menguar les opciones democrátiques de los ciudadanos”.
 
Pese a esta situación, la formación política asegura que va siguir trabayando pa solucionar los problemes reales d’Asturies y preparándose pa presentase a les eleiciones municipales y nacionales próximes. Nesti sen, aprovecharon pa facer un llamamientu a la xunidá de toles formaciones verdes, progresistes y que defiendan una alternativa social y más democrática n’Asturies que consiga superar actitúes sectaries, intereses de clanes o oportunismos personales.