Los Verdes denuncien la canalización del Nalón n’Olloniego

La formación política ecoloxista Los Verdes calificó d'intentu de "convertir el Nalón nuna canal d'agua pa un polígonu industrial" la obra que'l Conceyu d'Uviéu quier facer n'Olloniego y sobre la que la Confederación Hidrográfica del Norte yá alvirtió que pue suponer "una agresión inaceptable" pa la ribera del ríu.

Los Verdes denuncien que lo que se quier llevar alantre nel proyectu "Olloniego II" supón una "apropiación illegal" del dominiu público hidráulicu y el deterioru mediuambiental ensin torna de los ríos" alvirtiendo qu'ello pue traer arreyao un mayor riesgu d'inundaciones, datu que tamién conseñó la CHN, polo que-y piden a la entidá que defenda l'interés xeneral respetando les partes allegaes al calce del ríu que son de dominiu públicu. Ello ye que la primer fase del polígonu d'Olloniego, que s'inauguró nel añu 2002, resguardaba una faza de venti metros alredor del calce del ríu más llargu d'Asturies. L'agrupación uvieina de Los Verdes quier sorrayar el valor mediuambiental de les vegues de los ríos pola so fauna y vexetación y como elementos que caltienen l'equilibriu del sistema fluvial.