Los Verdes d’Asturies subasten “l’otru campanu” en Salas

Dientro de la so campaña de ‘Educación Ambiental Eleutoral’, Los Verdes d’Asturies, formación que va en coalición con Izquierda Xunida a les eleiciones del 22 de mayu, va celebrar una actividá participativa en Salas. Nella van subastar “l’otru campanu’, una llueca o zapatu sacáu del ríu Nonaya al so pasu per esta población.
 
L’actividá ta prevista pa les 17 hores y nella van participar Ernesto Sánchez, candidatu a conceyal per Salas y a diputáu per occidente; Joaquín Arce, direutor xeneral de Política Forestal y miembru de Los Verdes d’Asturies; Inés Prada, edil actual de Mediu Ambiente nel Conceyu de Ḷḷena y candidata a diputada de la Xunta Xeneral; y Dolores Hofmann, candidata a conceyala n’Avilés, amás d’otros militantes. Nun primer momentu, va llimpiase la zona del ríu Nonaya al so pasu per Salas, pa depués, a les 19 hores, celebrar un actu nel patiu del bar El Cobertizo.
 
Nél ta prevista la intervención de Sánchez, Arce y Prada, que van falar de temes d’interés llocal y nacional, como la construcción d’una central térmica de biomasa na zona o la llimpieza fluvia de los ríos asturianos, ente otros. Pa finar, y en plan cómicu, va subastase ente los presentes “l'otru campanu”, esto ye, “una llueca o un zapatu sacáu del ríu, un residuu representativo de los qu’acaben nél”, señala’l candidatu d’IX-LV a conceyal per Salas. D’esta forma, Los Verdes pretenden denunciar la situación d’abandonu que viven los ríos del conceyu.