Los venceyos ente los vaqueiros y los buckaroos, tema de la charra mensual d'Ástura

|
Los venceyos ente los vaqueiros y los buckaroos, tema de la charra mensual d'Ástura

Amable Concha va falar nel Atenéu Obreru de Xixón sobre 'L'orixe asturianu del Far West'.

¿Por qué esisten al empar nos Estaos Xuníos cowboys y buckaroos ('va-quei-rus')? ¿D'aú vien la cultura buckaroo? ¿Por qué atopamos una abondosa cantidá de nomes de familia esclusivamente vaqueiros nel senu d’esta comunidá? ¿Qué partes de la so cultura tan más averaes a nós? ¿Puede afirmase l’orixe asturianu d’esta comunidá del mediu oeste americanu?..., son dalgunes de les entrugues que va tratar de responder l'abogáu y antropólogu nesta conferencia entamada pola Asociación Cultural Ástura.

Concha trai al Atenéu Obreru de Xixón esti novedosu tema tres desendolcar un trabayu d'investigación empobináu a afitar, partiendo de les pallabres vaqueiru/buckaroo –que tienen semeyanza fonética y un mesmu significáu, pero que s’alluguen en entornos xeográficos y contestos culturales peralloñaos–, l’orixe vaqueiru de la treshumancia ganadera nos Estaos Xuníos. Asina, el doctor en Derechu Públicu esforcióse n’asitiar la isoglosa del términu buckaroo, n’investigar la onomástica vaqueira en Norteamérica y el so espardimientu xeográficu, n’afondar na bayura cultural de la comunidá a traviés de la Buckaroo Society Inc., y n’asoleyar numberoses semeyances cola nuesa propia comunidá vaqueira.

La conferencia sobre esti afayu percuriosu y orixinal sobre la herencia asturiana nos Estaos Xuníos d’América va tener llugar mañana nel llocal social del Atenéu Obreru de Xixón (Cuadonga, 7), a les 19.30 hores, con entrada llibre.

Contador Estadistiques