Los trabayos nel monasteriu de Santa María descubren un alcantarilláu del sieglu XVII

La retirada d'una rampla que servía de pasu de accesu del monasteriu de Santa María, en Vilanova d'Ozcos, al claustru permitió descubrir una canal del sieglu XVII que facía llabores d'alcantarilláu. Los trabayos van siguir pa descubrir  el restu del sistema de trayida y evacuación d'agua.

El descubrimientu fíxose nel marcu de los trabayos que, promovíos pola Direición Xeneral de Patrimoniu Cultural, se desendolquen nel monasteriu de cara a realizar una aproximación a la evolución constructiva del edificiu que permita planificar nel futuru los trabayos de documentación histórica y restauración. La retirada de la rampa, que taba rellena de tierra y piedres dende'l sieglu pasáu, permitió documentar la esistencia de la canal, que tenía funciones d'alcantarilláu y que ta construyida con paredes de mampostería y cubierta de grandes lloses de pizarra.

La conducción, d'aproximadamente un metru y mediu de profundidá, forma parte del sistema de saneamientu del monasteriu y tien como oxetu l'arramáu de les sos agües nel ríu que pasa xunto al edificiu. El tramu descubiertu permite tamién desvelar con claridá cómo la organización de la trayida d'agua y el sistema d'alcantarilláu nos monasterios se planificaben dende l'aniciu de les obres.

La direutora xeneral Otilia Requejo anunció que, a partir d'estos afayos inéditos, y nel momentu en que pueda afrontase la restauración del monasteriu, se fadrán escavaciones arqueolóxiques nueves pa conocer el restu del sistema de trayida y evacuación d'agua que, ensin dulda, percuerre'l subsuelu de Santa María de Vilanova d'Ozcos. Los trabayos actuales diríxelos l'arqueólogu Luis Germán Blanco y contaron cola collaboración de personal municipal y de vecinos del conceyu que, al traviés de la Asociación Orden de Vilanova, trabayen dende hai años en na recuperación d'esti monumentu d'induldable valor patrimonial fundáu nel sieglu XII que ye ún de los dos conventos históricos de la orden cisterciense n'Asturies, xunto a Santa María de Valdediós.