Los trés grupos de la oposición presenten una enmienda a la totalidá de los presupuestos de FAC

PSOE, PP y IX-LV presentaron estil lunes una enmienda a la totalidá del proyeutu de presupuestos de FAC. El Gobiernu diz nun entender la postura de los populares y defende les sos cuentes, que califica de “riguroses” y “reales”.

Los conseyeros de Presidencia y de Facienda y Sector Públicu, Florentino Alonso y Ramón del Riego, recordaron que si a lo último se refuga esti proyeutu, Asturies entraría nun escenariu de prórroga presupuestaria, con unes cuentes ellaboraes l'añu pasáu pol Gobiernu anterior. "Puedo entender que PSOE y IU tean cómodos nun escenariu de prórroga presupuestaria, pero nun entiendo que'l PP se sienta más cómodu con eses cuentes, cuando yá demostraron qu'arrastren un desfase de 600 millones por ingresos sobrovaloraos y gastos ensin incluyir", manifestó Del Riego sobre la enmienda a la totalidá del PP. Los dos dirixentes recordaron que les cuentes presentaese cumplen coles obligaciones de la estabilidá presupuestaria y coles magnitúes del Plan Económicu Financieru (PEF), cubre per primer vez el gastu sanitariu ensin acudir a partíes desplazaes, atiende de primeres el gastu social y respeta los techos máximos d'endeudamientu.

Pero amás, Del Riego esplicó que'l grupu parllamentariu de Foro Asturias Ciudadano (FAC) va introducir una enmienda que sigue los encamientos de la última xunta del Conseyu de Política Fiscal y Financiera, que va establecer el compromisu de cumplimientu de les esixencies d'estabilidá qu'imponga al Estáu la Xunión Europea. "El PP nin siquier lleó la enmienda", llamentó. D’igual forma, afirmó que ye un presupuestu "homologable" colos del restu de les comunidaes autónomes, incluyíes les gobernaes pol PP, qu'optaron por aprobar ún nuevu pal 2012 y nun prorrogar el del 2011. D'esta manera, utilícense les úniques previsiones disponibles, comunicaes pol Ministeriu d'Economía y Facienda'l pasáu 28 de xunetu del 2011, y cumple el so escenariu del Plan Económicu y Financieru, tanto nes cantidaes del déficit (316 millones) como na deuda contemplada (488 millones).

Les úniques "rocees", según el dirixente asturianu, vienen de los escenarios macroeconómicos pal 2012, que tovía nun suministró'l Gobiernu del Estáu. Pero dende l’Executivu vienen reclamándose "con insistencia" eses cifres, hasta con una carta del presidente asturianu, Francisco Álvarez-Cascos al presidente estatal, Mariano Rajoy.