Los Tejedor yá son "Llunáticos"

Los hermanos tejedor ya tienen na cai'l so segundu discu col nome de "Llunáticos".

Va pa tres años que los hermanos Tejedor sacaren aquel "Texedores de suaños" que tantu barullu llevantó. Depués d'aquel discu vinieron un bon númberu d'actuaciones n'Asturies y fuera, con una bona rempuesta por parte del públicu al directu del grupu. Pero depués de tres años se precisaba de dar otru pasu alantre pa la banda, había qu'ampliar el repertoriu y afondar nel estilu musical del grupu, y too ello traduzse nesti nuevu cd.

Igual que'l discu anterior, esti grabóse nos estudios "Elkar" de Donosti, contando con un bon númberu de collaboradores. Nesti trabayu vamos poder escuchar collaboraciones de xente como Kepa Junkera, Igor Medio, Fernando Arias, Horacio A. García, Oreka Tx, Xabier Zeberio, Alos Quartet, Ramón Prada, Ramón G. Morán, Merce Santos, James MacKintosh, Ibón Koterón y Lisardo Lombardía ente otros. Pero pa esti discu prefirieron apostar pola autoproducción, a diferencia del "Texedores de suaños" onde tuvieron a Phil Cunningham.

El discu sigue la llinia musical característica d'esti grupu, cola presencia de dalguna programación y reforzando la fuerza de les pieces más contundentes y aselando les pieces lentes. La compañía qu'edita'l cd ye "Aris Música" y va distribuyilu "Resistencia", compañía cola que los tejedores ya trabayaron nel discu anterior. "Tejedor" van presentar esti discu'l día 10 de xunu nel auditoriu príncipe Felipe d'Uviéu nun conciertu en que van contar cola presencia de gran parte de los músicos que participaron nel discu, y como nos adelantó'l gaiteru José Manuel Tejedor, pue que podamos ver dalguna sorpresa más.