Los supermercaos Más y Más siguen espardiéndose

La empresa de supermercaos de capital asturianu Más y Más facturó l'añu pasáu 72,4 millones d´euros, lo que supón una ganancia d´un 25% más. El beneficiu de la empresa nel añu 2002 foi de 1,8 millones d´euros, un 25% más respective al 2001. De fechu, los bonos resultaos del 2002 repítense esti añu tamién en cuantes que´l primer trimestre del 2003 yá rexistra una xuba del 20% nel beneficu y del 30% na facturación. Esta bona traza que presenta la marcha de la empresa vien de la bona estratexa de marketing que tien asina como de les modernes instalaciones y los avanzaos sistemes de xestión colos que se manda.



Otramiente, dientro del procesu d´espardimientu, Más y Más t´acabante de mercar cuatro supermercaos a la vasca Eroski y a la empresa El Árbol. Tamién tien en proyeutu facer un nuevu almacén p´alimentos frescos que puede costar cerca de 1,2 millones d´euros. Esti nuevu almacén que tien proyectáu sedría una nave de 9.000 metros cuadraos asitiada en Llanera dientro del complexu de Mercasturies. Otramiente, ente les sos estratexes de mercáu, la compañía asturiana va entamar un plan especial de fruta fresca como complementu del so plan de carnes d´Asturies.



La cadena de supermercaos ye propiedá del mayorista en distribución Hijos de Luis Rodríguez, S.A.. La empresa matriz tien una filial con cuatro centros Cash&Carry pa minoristes nomaos EuroCash arriendes de los 35 supermercaos Más y Más. Tamién furne d´artículos alimentación a tiendes pequeñes n´Asturies, Llión, Galicia y Cantabria, algamando una cuota del 6% del mercáu astur. L'aniciu de la compañía vien de 1939, cuando entamó l´actividá como una cenciella tienda d´alimentación.