Los socialistes uvieinos piden un serviciu de normalización pal conceyu

El grupu socialista nel Ayuntamientu d'Uviéu presentó'l pasáu xueves nel rexistru del Ayuntamientu d'Uviéu una moción na que solicita la creación d'un Plan de Normalización Sociollingüística nel ámbitu del conceyu, ellaboráu cola participación social y l'asesoramientu de la Oficina de Política Llingüística del Principáu d'Asturies y l'Academia de la Llingua Asturiana.

Ente les midíes que se proponen nel plan qu'ufierten los socialistes carbayones ta l'aniciu d'un Serviciu de Política Llingüística, que coordine la execución del Plan de Normalización y dea puxu a toles actuaciones municipales encaminaes a promover y protexer la llingua asturiana.

La ellaboración pola Xunta de Toponimia del Principáu d'Asturies del espediente de topónimos del conceyu ye otra de les midíes propuestes en plan, que llama tamién a "Afalar l'usu de la llingua asturiana na señalización, y publicidá institucional, promoviendo la publicación billingüe, asina como la utilización de la llingua asturiana nos estremaos medios de comunicación municipales"

Nel ámbitu de la representación, la propuesta socialista, que firmen los conceyales Gonzalo Olmos y Jorge Fernández Bustillo en calidá de voceru del grupu socialista, píde-y al conceyu que gobierna Gabino de Lorenzo una "collaboración activa del Ayuntamientu nes diferentes iniciatives sociales y culturales enveredaes a potenciar y promover la llingua asturiana, emprincipiando pola propia celebración anual del Día de les Lletres Asturianes". Too ello habría rematase cola ellaboración y aprobación d'unes Ordenances d'Usu y Promoción de la Llingua Asturiana qu'afiten los derechos llingüísticos de toes aquelles persones a les que-yos pete emplegar l'asturianu como llingua principal pa la so comunicación.

Na esposición previa de motivos, la moción recuerda que la Conceyalía de la Mocedá del Ayuntamientu d'Uviéu y el Conseyu de la Mocedá d´Uviéu (CMU) yá tienen una campaña institucional p'afalar a los mozos uvieinos a emplegar la llingua asturiana y creen que ye'l momentu de qu'estes campañes positives hacia l'asturianu s'enanchen. Pa los socialistes uvieinos vívese un momentu "de particular intensidá" no que se refier a la implicación de los conceyos asturianos na promoción y protección de la llingua asturiana, con cada vegada más conceyos creando los sos servicios de normalización, y ven que ye'l momentu de que L'Ayuntamientu d'Uviéu s'amieste a esta corriente d'iniciatives a favor de la llingua asturiana, "probando qu'amás d'acciones puntuales pue desenvolver una política bien fundamentada y planificada p'afalar esti activu propiu y garantizar los derechos llingüísticos d'aquellos que la usen como vehículu de comunicación".