Los socialistes uvieinos denuncien una "subvención tapecida" a les corríes de toros

El conceyal socialista nel Conceyu d'Uviéu Gonzalo Olmos denunció ayeri énte la opinión pública l'alcuerdu de la Xunta de Gobiernu uvieina del pasáu 24 d'abril pol que'l conceyu se comprometió a a mercar entraes por importe de 50.000 euros pa la corrida de toros que va celebrase na capital asturiana esti sábadu con motivu de les fiestes de l'Ascensión

El Grupu Socialista diz que l'alcuerdu consiste n'alquisición a la empresa promotora de la corrida, Tauro Toro SL de cerca de 2.600 papeletes, ello ye, la tercera parte de la capacidá de la plaza de toros de Buenavista, na qu'entren 9.630 espectadores, pagando por cada entrada un preciu aproximáu de 19 euros. Según Gonzalo Olmos, el conceyu uvieín recurre davezu a esta midida que calificó de "subvención indirecta" y aseguró que con ella intenta "asegurar una mínima presencia de públicu nel espectáculu taurinu, en cuantes que d'otra manera, "posiblemente l'asistencia diba ser mui escasa por nun ser esi un espectáculu que tenga'l preste de los uvieinos". Olmos acusó al PP de "fomentar artificialmente esta triba d'espectáculos, apautando pa ello un sofitu "que yá quixeren pa ellos los demás promotores, empresarios o asociaciones qu'organicen otros eventos culturales de más interés n'Uviéu".

El conceyal socialista uvieín llamentó que s'intente "garantizar el resultáu económicu de la empresa ensin que se xustifique'l calter d'interés xeneral del espectáculu" y acusó al alcalde Gabino de Lorenzo de cebar el clientelismu al traviés de los centros sociales y les alcaldíes de barriu, repartiendo les entraes al so criteriu pa "fidelizar clientela".