Los sindicatos van movilizase pola intención del Gobiernu de “nomar a deu” a funcionarios

UXT, CC OO, Usipa, CSIF y CSI, sindicatos de la Xunta de Personal Funcionariu de l’Alministración, van movilizase pola intención del Gobiernu, según la so opinión, de “nomar a deu” a funcionarios. La primera aición, esti vienres.
 
Fini Muñiz López (UXT), José Antonio Fernández Morán (CC OO), Juan Antonio Gavira (CSIF), Miguel Ángel González (CSI) y José Luis González (Usipa), acusaron güei al Gobiernu de pretender convertir un concursu de méritos pa los xefes de negociáu y de seición nun proceso tapecíu de “llibre designación” al incluyir una entrevista y una memoria, elementos que sumen casi el 25 por cientu de la nota. La “suxetividá” y “discrecionalidá” d’estos procedimientos fai que los sindicatos faigan referencia a éstos como “nomamientos a deu”.
 
Por ello, van entamar un calendariu de movilizaciones que va tener esti llunes, a les 12.30 hores, el so primer capítulu nel Edificiu de Servicios Múltiples, n’Uviéu. Amás, CSIF y Usipa van presentar incidentes d’execución de sentencia pa parar esta situación, yá que, según recordaron, hai seis fallos de tribunales qu’impiden estos métodos. José Luis González, d’Usipa, acusó al direutor xeneral de Función Pública, Daniel Álvarez Rodríguez, “de mentirosu y sinvergüenza” al señalar qu’esti métodu nuevu ye más modernu y áxil. Tamién recordó que’l procedimientu yá s’aplicó nel 1993 y se retiró “pola cantidá de reclamaciones que presentaben los trabayadores”. “Ya lo vivimos. Dáben-y los puntos a determinaes persones pa que se quedaren col puestu”, criticó.
 
Según esplicó’l representante d’Usipa, la memoria y les entrevistas van contar con cinco puntos, mientres que nel resto d’aspectos –trabayu desarrolláu, cursos, antigüedad, ente otros– les diferencies de puntuación van ser mínimes, polo que "la obtención de la plaza va basase nesti métodu, discrecional y suxetivu”.