Los sindicatos piensen que Duro Felguera plania "un zarru escalonáu"

Los comités d'empresa de los talleres de Calderería Pesada, Construcciones Mecániques y Melt que Duro Felguera tien n'Asturies, creen que la empresa plania "un zarru escalonáu" de toles sos instalaciones na comunidá.

Por esti motivu pol anunciaron movilizaciones a les que van convocar a la totalidá de la plantiya. La "baxísima carga de trabayu" nos centros y la falta d'inversiones na "obsoleta maquinaria" son aspectos que xeneren rocea a los representantes de los emplegaos, que denuncien la intención de la empresa de subcontratar fuera de la UE.
  
Avelino Fernández de Felguera Calderería Pesada de Xixón, Jorge González, del Comité d'Empresa de Felguera Melt, y Pablo Barroso, de Felguera Construcciones Mecániques, ofrecieron güei una rueda prensa pa denunciar públicamente esta situación, tres l'anunciu, per parte de la empresa, del despidu de 90 emplegaos nesti últimu taller, en Barros.
  
Los trés representantes sindicales llamentaron la difícil situación que se vive nos sos respectivos talleres. "En Felguera Construcciones Mecániques nun tenemos nada, tamos paraos nesti momentu", señaló Barroso. En Calderería Pesada "pasóse l'añu 2010 bien mal d'obra y vamos entrar en perdes, algo que nun pasa dende hai muncho tiempu", comentó Avelino Fernández.

En Felguera Melt Jorge González matizó que "dempués d'un añu malu con baxísima carga de trabayu, agora repica l'actividá nel taller un pelín, pero nun ye la obra más afayadiza pa les instalaciones; va dar ocupación pero non beneficios al mediu plazu".
  
Zarralo too “escalonadamente”
Según Barroso, "ye un plan antemanáu pa dir zarrándolo too escalonadamente". "Ta afogándosemos", llamentó. Con éses tienen claro que los despidos anunciaos "nun se restrinxen namás a los talleres de Barros, sinón que ye'l preludiu de midíes asemeyaes que pretenden tomase nel restu de filiales del Grupu". "Too esto forma parte d'una estratexa de Duro Felguera pa zarrar tolos sos talleres n'Asturies", señalen nun comunicáu conxuntu.
  
Según la mesma nota, la empresa "pretende aumentar el so  marxe d'arriquecimientu subcontratando tola producción y inxeniería de les sos obres en países subdesarrollaos, pa dedicase namás a especular y nun producir". Según Barroso, los sindicatos tienen constancia de qu'obres que se debíen realizar nel taller de Construcciones Mecániques executáronse en fábriques en Bulgaria.
  
Beneficios más grandes
Los representantes sindicales critiquen tamién qu'esta situación se produza cuando la empresa llogró "los beneficios más grandes de la so historia", lo que demostraría que "pretende aprovechar l'argumentu d'una crisis que nun-y ta afectando sustancialmente pa eliminar puestos de trabayu n'Asturies".
  
Asina, el miércoles de la próxima selmana los trés comités d'empresa van anunciar un calendariu de movilizaciones conxuntu, al que van convocar a tola plantiya. Nesti momentu hai 166 emplegaos en Felguera Construcciones Mecániques, unos 140 en Felguera Melt y ente 200 y 230 en Calderería Pesada.