Los sindicatos nun s’enfoten na baxada del paru que da la EPA

Según los datos de la Encuesta de Población Activo que s'asoleyaron ayeri, el paru baxó nel cuartu trimestre del 2003 en 7.400 persones n'Asturies. Con too y con ello, el númberu de demandantes d'emplegu ye de 44.300, ello ye, 2.300 más qu'al acabar el 2.002 (+5,5%). Según los datos oficiales de la EPA, la población de mayores de 16 años baxó nel últimu trimestre del 2.003 de los 922.300 habitantes a los 921.800, mientres que la cifra de población activo baxó al tenor d'ello, pasando de 441.700 a 441.300 persones. Na interanual, la baxada ye de -1.700 persones

El conseyeru d'emplegu, Graciano Torre, congracióse por estos datos en cuantes que'ldescensu del númberu de paraos ye'l más importante del estáu, siendo Asturies la tercer comunidá en que más xube la ocupación, pero los sindicatos nun concueyen cola visión del conseyeru. Asina, el secretariu d'UXT Justo Rodríguez Braga diz que la meyora foi relativa y que l'avance nesti sentíu va mui despacio. El dirixente de la primer central sindical asturiana matizó les declaraciones de Torre y remembró qu'entovía falta muncho p'allegase a la media española. CCOO foi más dura nel analís, afirmando que la EPA nun espeya la realidá del mercáu llaboral asturianu, amás de ser un instrumentu poco creíble de medición del mercáu llaboral tres de los cambeos metodolóxicos que se-y amestaron nel mes de mayu del añu 2.002. La EPA, que vien faciéndose dende 1.964, ye un estudiu del INE que tien por encontu metodolóxicu una encuesta sobre unes 65.000 families en tol estáu.