Los sindicatos mayoritarios esixen al Gobiernu estatal que “reflexone” tres les movilizaciones del domingu

Ignacio Fernández Toxo y Cándido Méndez, secretarios xenerales de CC OO y UXT, esixen al Gobiernu estatal que “reflexone” sobre la reforma llaboral tres les movilizaciones del domingu. En Xixón salieron a la cai 40.000 persones.

Los dos cabezaleros de los sindicatos mayoritarios confirmaron güei que'l Gobiernu de Rajoy nun se punxo en contautu con ellos tres les manifestaciones, "les más masives de la historia de la democracia". Sicasí, pidiéron-y que "cavilgue" porque "tovía tien tiempu" p'abrir un procesu de negociación colos axentes sociales "paralelu" al trámite parllamentariu qu'evite una "escalada" de la conflictividá social.

Sobre si esa escalada pue acabar nuna fuelga xeneral, indicaron qu'enantes de plantegar esta posibilidá "hai qu'esperar a que'l Gobiernu dea una respuesta". "A partir d'ehí, vamos tomar les determinaciones que consideremos oportunes", señaló Méndez.  “Hai posibilidaes de modificar en too o en parte'l conteníu del real decretu al traviés de les enmiendes que s'introduzan nel Congresu y el Senáu", dixo Toxo, que concretó que los sindicatos apuesten por que s'abra "en paralelo una mesa de negociación colos "interlocutores sociales" pa que les sos conclusiones s'introduzan nel proyeutu de Llei, vía enmiendes.

Polo pronto, los sindicatos van siguir reuniéndose esta selmana colos grupos parllamentarios pa influyir na reforma y van caltener un alcuentru col Grupu Popular el xueves próximu nuna xunta "na que-y presentarán alternatives distintes" al so real decretu.