Los sindicatos CSI, CGT, CNT y SUATEA salen a la cai esti sábadu

Uviéu va acoyer esti sábadu una movilización nueva contra la política económica, llaboral y social de los gobernantes. CSI, CGT, CNT y SUATEA convoquen esta protesta que va tar formada por dos marches que van xunise na Estación del Norte.
 
A les 10.30 hores va partir del hospital nuevu, asitiáu al final de la cai Amsterdam, una marcha pola ecoloxía social, esto ye, “contra la esclusión social y el racismu, la corrupción política y la especulación urbanística, la desapaición del mundu rural, la destrucción del mediu ambiente y l’esmantelamientu de les cuenques mineres”. A la mesma hora, otra marcha, nesti casu contra’l pautu social, va salir de la Facultá de Melecina, na cai Julián Clavería: “contra la reforma llaboral y el pensionazu, el despidu llibre y la contención salarial, los recortes sociales y la privatización de servicios, la precariedá y l’acumalación capitalista”.
 
Pa les 13 hores, tres xunise dambes marches na Estación del Norte, va salir una manifestación hasta la Xunta Xeneral, que va ser arrodiada por una cadena humana. Tres esti actu, a les 14 hores, los convocantes van entamar una consulta popular y una xinta nel llugar, que va tar amenizada por música. Esta protesta lleva’l nome de ‘Vamos llevantar cabeza. Sal a la cai enantes que te dexen nella’ y pretende movilizar y concienciar a la xente en plena campaña eleutoral. “El 22 de mayu qu’entra son les eleiciones autonómiques y a conceyos. Nun podemos consentir que sían unes eleiciones más, como si nun tuviere pasando nada. Reducir la nuesa participación a un votu ye lo mesmo que reducir la nuesa vida social al tique de la compra. Nun podemos siguir asina. Necesitamos para-yos los pies y pa eso tenemos que poner los nuesos en marcha”, aseguren los sindicatos, que reclamen “que s’escuche la nuesa voz de trabayadores”.