Los Sidros y La Comedia de Valdesoto tornen a ser embaxadores asturianos nel FIMI de Lisboa

Esti xueves da aniciu la novena edición del Festival Internacional Máscara Ibérica (FIMI), qu’axunta per cuatro díes a miles de persones en Lisboa. Los Sidros y La Comedia son un añu más la representación asturiana nel desfile.

 

Más de quinientes persones pertenecientes a 34 mazcaraes procedentes d’Asturies, Portugal, Galicia, Lleón, Zamora, Salamanca, Cáceres y Brasil, a les qu’hai que sumar los Mamuthones e Issohadores Pro Loco Mamoiada, de la isla mediterránea de Sardigna, van participar el sábadu nel eventu principal del FIMI, el Desfile Máscara Ibérica. Ésti, con salida a les 16.30 hores de la Praça del Municipio y trayeutu pela Rua do Ouro hasta llegar a la Praça do Rossio, axunta alrededor de 70.000 persones tolos años pa disfrutar d’una amestura de folixa, música y coloríu. Nesta ocasión, les formaciones participantes, amás de la mazcarada sarda, son los Caretos de Lagoa, los Caretos de Parada, los Caretos de Varge, los Caretos de Lazarim, los Caretos de Vila Boa, los Cardadores de Vale de Ílhavo, el Chocalheiro de Bemposta, el Velho de Vale do Porco, la Festa dos Velhos de Bruçó, el Menino de Tó, los Caretos de Podence, l’Entrudo das Aldeias do Xisto de Góis, los Diabos de Amarante –debutante nel FIMI– y los mirandeses Pauliteiros da Granja (Portugal); los Mascarados de Maragojipe (Brasil); Os Boteiros y Folión de Viana do Bolo, los Troteiros de Bande y les Bonitas de Sande (Galicia); Los Toros y los Guirrios de Velilla de La Reina y Los Jurrus d’Alixa (Lleón); El Atenazador de San Vicente de la Cabeza, la Visparra de San Martin de Castañeda, los Diablos de Sarracín de Aliste, los Cencerrones de Abejera, La Filandorra de Ferreras de Arriba, Los Carnavales de Villanueva de Valrojo, La Vaquilla y los Cencerros de Palacios del Pan, El Tafarrón de Pozuelo de Tábara y La Vaca Bayona de Almeida de Sayago (Zamora); Los Hombres de Musgo de Béjar (Salamanca); Las Carantoñas de San Sebastián, las Jarramplas, y Los Negritos de Montehermoso (Cáceres); y Los Sidros y La Comedia (Asturies).

 

La Praça do Rossio ye l’epicentru d’esta folixa que s’allarga per cuatro díes y que puxa pola gastronomía, l’artesanía y la música de los territorios ibéricos participantes. Asina, nesti ampliu espaciu lisboeta asítiase la Mostra das Regiões, onde Asturies va tener representación al traviés del stand del Conceyu de Siero y de Turismu Xixón. Amás, van entamase delles amueses de cocina, una d’elles protagonizada por Marcos Morán, del popular establecimientu hosteleru de Prendes (Carreño), Casa Gerardo.

 

Skama la Rede nel ‘Palco Ibérico’

 

La nueche tamién ye protagonista nel FIMI al traviés de la música, cola celebración del ‘Palco Ibérico’ nel escenariu de la Praça do Rossio. Asina, mañana, lisboetes y visitantes van poder disfrutar a les 22 hores del direuto de Skama la Rede, que repite tres l’esitosu conciertu d’hai dos años. El sábadu’l turnu va ser pal vascu Kepa Junkera dientro de la so xira de nome ‘Galiza’ cola que tuvo recién en Xixón. Zarren esta estaya los portugueses Ginga’l domingu a les 18 hores.

 

Xunto a éstes y otres actividaes con protagonismu asturianu, hai que destacar la presencia continua de Los Sidros y la Comedia nes cais de Lisboa mientres los cuatro díes del festival entamáu pola asociación cultural Progestur, siendo los de Valdesoto yá bien conocíos polos habitantes de la capital portuguesa. Tamién van facer animación los mirandeses Pauliteiros da Granja, los gallegos del Folión de Viana do Bolo y los sardos Mamuthones e Issohadores Pro Loco Mamoiada.

 

Na imaxe, Los Sidros bromien con una espectadora nel desfile del añu pasáu. Semeya obra d'Iván G.