Los quesos Cabrales y Gamonéu afiten la medría na producción

Los quesos con Denominación d’Orixe Protexida (DOP) Cabrales y Gamonéu aumentaron la producción nos postreros cinco años un 53 y un 40 % respectivamente.

La conseyera de Desenvolvimientu Rural y Recursos Naturales, María Jesús Álvarez, qu’asistió en Cangues d’Onís a la entrega de premios del 77.u Concursu Esposición de Quesos de Los Picos d’Europa, resaltó que lo de Cabrales algamó una producción de 500.000 quilos nel 2016, con un valor económicu de cinco millones; mentes que de lo de Gamonéu ellaboráronse 132.000 quilos, con un valor de mercáu de dos millones.

La conseyera sorrayó la importancia económica de la tresformación de les producciones primaries pa convertiles nun productu ellaboráu que, “nel casu del quesu, multiplica por diez el valor”.

Amás, repitió’l respaldu del so departamentu a los conseyos reguladores de les denominaciones d’orixe protexíes Cabrales y Gamonéu y valoró l’esfuerciu de los artesanos por afalagar la producción "calteniendo la tradición y incorporando la innovación p’atender a un consumidor más esixente caldía".

N’Asturies prodúcense na actualidá cuatro clases de quesu con DOP: Cabrales, Afuega’l pitu, Gamonéu y Casín. A estos súmase la IXP (identificación xeográfica protexida) de Los Beyos.

Les figures de calidá estremada, DOP y IXP, son marques que protexen productos agroalimentarios con unes característiques vinculaes intrínsecamente col so orixe xeográficu. Esta protección, según esplicó Álvarez, “busca asegurar a los productores unos ingresos equitativos poles cualidaes y les característiques del productu y del so métodu de producción, y ufiertar información clara sobre los alimentos amparaos pa que’l consumidor faiga la so elección de compra con más conocimientu de causa”.

Tamién recordó la conseyera qu’Asturies ye “la zona quesera más grande de toa Europa, cola ellaboración de más de 40 clases de quesu”.