Los que quedaron fuera

La Unión Renovadora Asturiana y el
Partíu Asturianista, les dos fuerces más votaes dientro de les
que quedaron ensin representación parllamentaria nes elecciones, pasen
estes selmanes un tiempu d'espera curando les mancadures del trastazu electoral y recuperando l'ánimu, qu'anda gachu, pa decidir qué estratexes van tomar
d'agora en p'alantre.



La primera en decidir daqué va ser la URAS. Fontes del partíu de Sergio
Marqués garantizaron a Asturies.com la continuidá del proyectu
políticu y esplicaron que la xunta del prósimu día 20 de
xunu va ser onde se faiga la valoración final de los resultaos
electorales y onde entanme a diseñase la estratexa pa esti nuevu ciclu
políticu, nel que URAS, anque fuera del parlamentu, cuenta con trenta
conceyales y dos alcaldíes



Per otra parte, el Partíu Asturianista va allongar un poco más la
toma de decisiones. A los asturianistes, que tamién-yos mancó abondo'l mal resultáu
electoral, tocába-yos xunta ordinaria del partíu pa esti mes,
pero quixeron más dexala pa depués de les elecciones, y nun va
ser hasta'l 26 de xunetu en que'l partíu que dirixe Xuan Xosé
Sánchez Vicente faiga una asamblea en que va remocicar cargos y poner
una directiva nueva cola que volver a la política activo yá
en pasando'l veranu. Anque la desapaición del PAS llegó a comentase en dellos ambientes, les fontes consultaes garantizaron la
supervivencia de la organización y del proyectu políticu que defende.



Otramiente, y respective al ruxe-ruxe qu'hai estos díes de posibles
aliances con otres fuerces que se vien comentando estos díes, el PAS
afirmó que nun recibieron nin mandaron ufierta a nengún otru
partíu, y, anque nun descarten la posibilidá de futuros alcuerdos, "como ye normal en política", apunten que ye temprano pa falar d'ello.