Los Pueblos Deciden aconceyó pa repasar la llexislatura

L'autopista del mar, los fondos mineros o la situación de la llingua tratáronse nel aconceyamientu de la coalición Los Pueblos Deciden. Nella participa Andecha Astur.

Representantes de les formaciones que conformen Los Pueblos Deciden, esto ye, EH Bildu, BNG, Andecha Astur, Puyalón de Cuchas, Alternativa Nacionalista Canaria y Unidad del Pueblo, reuniéronse en Zarautz pa repasar "les actividaes más importantes desendolcaes pol equipu nel Parllamentu Européu, y les iniciatives que ta llevando alantre Josu Juaristi, valorándose perpositivamente la so xera y agradeciendo la rapidez y lo interesante del intercambiu d'información", apunten dende la formación asturiana. El TTIP, la cuota lláctea, la economía circular, los derechos nacionales, la visita del Rei español y l'Informe de la Rede Europea pola Igualdá d'Idiomes son dalgunos de los temes que se trataron na reunión.

No que respeuta a asuntos d'interés p'Asturies, Andecha Astur treslladó'l tema de Bañugues, l'Autopista'l Mar, los fondos mineros y la represión llingüística que se vive nel país. Tamién requirió información sobre mecanismos d'actuación européu sobre estos temes y otros asemeyaos. Los Pueblos Deciden cuenta con un diputáu nel Parllamentu Européu.