Los Premios Príncipe d'Asturies lleguen a la so 24 edición

El Príncipe d'Asturies fai a les 6 y media d'esta tarde nel Teatru Campoamor d'Uviéu la entrega de los galardones de la 24 edición de los Premios Príncipe d'Asturies

El periodista francés Jean Daniel, fundador y director del selmanariu "Le Nouvel Obsevateur" ye'l premiáu na estaya de comunicaciones, mientres que'l d'investigación foi al equipu d'oncólogos americanos Judah Folkman, Bert Vogelstein, Tony Hunter, Robert A. Weinberg y l'español Joan Massagué.

Nome más conocíu pol gran públicu ye'l del economista Paul Krugman, premiu de Ciencies Sociales, anque ensin dulda la figura más popular ye la del premiáu n'artes, el guitarreru y compositor Francisco Sánchez Gómez "Paco de Lucía".

L'escritor italianu Claudio Magris ye'l premiu de les lletres, mientres que'l premiu de Cooperación Internacional va pa ún de los proyectos con más éxitu de la Unión Europea en materia d'Educación, el Programa Erasmus, recoyendo'l galardón la Comisaria d'Educación y Cultura de la UE, Viviane Reding.

Otra entidá, el Camín de Compostela, va recibir el premiu de la Concordia, que va recoyer l'Arzobispu de Santiago, Julián Barrio, mientres qu'ún de los premios de creación más nueva, el de deportes, va dir pal atleta marroquín Hicham El Guerruj, quien yá dio anuncia de que va donar los 50.000 euros del premiu a la construcción d'escueles nel so país.

L'actu va poder seguise per la TV y tamién per internet, gracies a la canal especial que tien preparada la Fundación Príncipe d'Asturies na so web