Los Premios Princesa cambien el Campoamor pol Hotel Reconquista

La pandemia de COVID-19 marca tolos eventos que s’organicen nel país, tamién los Premios Princesa, que pasen del Campoamor al Reconquista pa evitar aforos grandes. Les reivindicaciones nun van faltar nesta edición de los gallardones, contestaos tamién por una yá viral campaña de l’Asamblea Moza d’Asturies (AMA).

La princesa Leonor, acompañada polos sos padres Felipe VI y Letizia, y la so hermana Sofía, aportó ayeri a Asturies, participando en delles actividaes programaes pola Fundación Princesa de Asturias. La so güela Sofía, que nunca falta a la ceremonia, fíxolo güei, mentes que’l so maríu Juan Carlos I sigue n’Emiratos Arabes Xuníos dende’l 3 d’agostu, cuando decidió abandonar España.

La ceremonia va desendolcase dende les 18.30 hores nel ‘Salón Covadonga’ del Eurostars Hotel de la Reconquista, cola presencia física de dalgunos de los premiaos. Asina, desplazáronse a Uviéu Andrea Morricone, en representación del so pá, el fináu Ennio Morricone, merecedor del gallardón d’Artes xunto con John Williams; Cristina Fuentes y María Sheila Cremaschi, del Hay Festival, de Comunicación y Humanidaes compartíu cola Feria Internacional de Libro de Guadalajara; Carlos Sainz, de Deportes; y Emmanuel Candès, d’Investigación Científica y Téunica con Yves Meyer, Ingrid Daubechies y Terence Tao; amás de dellos representantes de coleutivu sanitariu, de Concordia.

El restu de condecoraos son Dani Rodrik (Ciencies Sociales), Anne Carson (Lletres) y el consorciu internacional ‘Gavy, the Vaccinne Alliance’ (Cooperación Internacional). Mañana, Somao va recibir el XXXI Premiu al Pueblu Exemplar d'Asturies, qu’entama tamién la Fundación Princesa con bases espublizaes nes trés llingües falaes nel país.

Movilizaciones y carta a Leonor

La xornada d’entrega de los Premios Princesa ta acompañada dende hai dellos años por movilizaciones sociales y antimonárquiques. A les 18 hores ta convocada pola Corriente Sindical d’Izquierda (CSI) nel llugar habitual, la Escandalera tres la negativa de la Delegación del Gobiernu estatal n’Asturies avalada pol Tribunal Superior de Xusticia d’Asturies (TSXA) de facelo frente al Reconquista, una concentración baxo’l lema ‘-Premios, +Medios, Sanidad Pública’.

Una hora más tarde, a les 19 hores, la plataforma ‘Asturies nun tien rei’ entama una manifestación dende la cai Emilio Alarcos, nes escaleres d’El Milán, hasta la Escandalera. Nesta ocasión lleva’l títulu de ‘+Sanidá, educación y pensiones. -Monarquía. Non a los Premios Princesa’.

A lo llargo de la selmana, amás, el coleutivu AMA vien desendolcando delles aiciones con repercusión en redes sociales baxo’l lema ‘Premiados bienveníos, Borbones despidíos’. “Queremos amosar de manera pública’l nuesu respetu y la nuesa almiración hacia los premiaos y les premiaes d’esti añu, persones y instituciones que, en nidia contraposición cola monarquía, faen aportaciones positives a la nuesa sociedá y a la nuestra cultura dende les so diferentes ámbitos d’actuación”, gallardonaos a los qu’unviaron una carta de felicitación na que-yos espliquen que resulta “difícil comprender” el motivu de “venceyar el so nome, el so prestixu y la so imaxe pública a los d’una institución antidemocrática, investigada por corrupción y n’evidente decadencia qu’usa ensin tapuxos la imaxe de prestixu d’estes personalidaes p’atapar les so vergoñes”.

Amás de dellos cartelos n’asturianu y castellanu que dan imaxe gráfica a la campaña, esta organización asoleyó ayeri un videu yá viral en redes sociales na qu’una moza de La Camocha de mesma edá que Leonor escribe una carta a la princesa.

Na imaxe, el presidente Adrián Barbón nel Patiu de los Gatos del Reconquista xunto cola Familia Real na audiencia a los premiaos d'esta mañana. Semeya obra d'Armando Álvarez.