Los premios de la SGAE reconocen la carrera de Chus Pedro

Chus Pedro Suárez consiguió na nueche d'ayeri'l premiu al meyor cantar n'asturianu de l'Academia de la Música pol tema "Agora sal a baillar" compuestu sobre base tradicional por elli y por Gabino Antuña, tradicional teclista del grupu Nuberu y gran collaborador de Chus Pedro. El premiu reconoz la trayectoria d'ún músicu veteranu al empar que comprometíu de siempre cola llingua asturiana. Chus pedro competía por esti galardón col grupu mierense de folk "Skanda" que presentaben el so tema "Sangre d'Ochobre" y con "La Pola de Siero" del cantante de Sotu'l Barcu Vicente Díaz.

La del cantante del dúu "Nuberu" ye una de les biografíes más estenses de la música n'asturianu. Fundador a mediaos de los 70 de Camaretá, grupu sociocultural entreguín del que guañó la esperiencia de Nuberu, Chus Pedro lleva nos escenarios cerca de 30 años. El tema pol que recibió'l premiu ayeri enxértase nel so discu "De Ñublu y Orpín" trabayu editáu por "Fonoastur" y que foi'l primer proyectu en solitario del cantante del Entregu. La idea que cuayó finalmente en "De ñublu y orpín" ñació de la que Chus Pedro collaboró nel discu de Tejedor "Texedores de suaños" nel añu 1999, pero foron precisos cuatro llargos años pa que se concretare.

Cola collaboración na producción de les mezcles del miembru de Capercaillie Donald Shaw y de Paul Mc Geechan, el discu ta producíu por Gabino Antuña y Donald Shaw, y nelli, amás del acabante premiar "Agora sal a bailar" inclúyense ótros cantares tradicionales como "Soi de Verdiciu", "Ecos de la Quintana" o "Yo fui al carmín de la Pola" toos ellos trataos con estilu "atlánticu" como diz el mesmu Chus Pedro.

Los otros asturianos que taben nominaos nel restu de categoríes quedaron ensin premiu, anque tanto pa Ramón Prada, candidatu na categoría de "nueves músiques", como pal grupu Mala Reputación, candidatos al reconocimientu al meyor grupu de rock alternativu, yá foi un éxitu el poder metese na llista de finalistes.