Los premiaos ‘El silenciu invisible’ y ‘Los xardinos de la lluna’ yá tán disponibles pa los llectores

José Ángel Gayol y Francisco ‘Paco’ Álvarez’ presentaron nel marcu de la Feria del Libro de Xixón les sos obres gallardonaes nos Premios Lliterarios 2019. L’ensayu ‘El silenciu invisible’ y la novela ‘Los xardinos de la lluna’, editaos dambos por Trabe, atraxeron a munchu públicu magar l’agua qu’acompañó la tarde.

La programación del certame llibreru xixonés asitió dambes presentaciones siguíes, con media hora de diferencia, en carpes diferentes y la mesma compañía: María Cristina Valdés, encargada de conducir los actos, y Antón García, direutor xeneral de Política Llingüística. La primera foi la d’Álvarez, ganador del XL Premiu Xosefa Xovellanos de novela por 'Los xardinos de la lluna', que coincidió a la mesma hora cola de 'Un home que cava' (Impronta), de Ramon Lluís Bande.

“Quixi facer un cambiu drásticu con respeuto a la primer novela”, la tamién premiada col Xosefa Xovellanos ‘Lluvia d’agostu’ cuatro años enantes, confesó’l periodista xixonés. “Pasé de la épica a la llírica”, añadió sobre una obra ambientada na Italia d’anguaño al rodiu les Brigaes Coloraes Refundaes, pa la que se documentó en temes tan diversos como l’astrofísica: “la llingua asturiana tamién val pa falar de la lluna y de les estrelles”, aseguró.

Pintures y entendimientu

Gayol, ganador del XXV Premiu Máximo Fuertes Acevedo d'ensayu, tomó la pallabra tres un bastiazu que desallugó de xente la zona de venta de llibros. Sicasí, con paragües y chubasqueros, hebo públicu que s’averó a la carpa númberu 1 del paséu de Begoña, onde hasta’l domingu va tar instalada esta feria, qu’esti añu tamién s’espardió hasta la cai Tomás y Valiente pa garantizar la distancia interpersonal ente los visitantes.

Valdés definió ‘El silenciu invisible’ como “un testu visual, con un componente verbal y un componente non verbal que se fusionen”. L’autor, al traviés de pintures, y col silenciu como filu conductor, va faciendo análisis sociopolíticos sobre temes como’l neolliberalismu o los deberes de la ciudadanía, poniendo exemplos de dellos llugares, principalmente de la política estauxunidense y francesa, pa entender y comprender la realidá.

“Tanta información paez un ruíu que se traduz nun silenciu. Pensamos qu’oyimos muncho y en realidá nun nos tamos enterando de nada. Ye un silenciu manexable y invisible”, apunta Gayol, qu’añade que col llibru pretende “tratar de romper esi silenciu; qu’esa voz se sintiera nel papel de la mesma manera qu’hai una voz silenciosa cuando mires una pintura”.