Los policíes sublevaos pensaron en matar a Correa

La grabación de la Radio Patrulla de la Policía Nacional ecuatoriana reveló qu'algunos de los axentes que participaron na sublevación teníen la intención d'asesinar al presidente, Rafael Correa, nun intentu de golpe d'Estáu.

Na grabación, fecha pública pola axencia estatal de noticies Andes, escúchase la voz d'ún de los policíes sublevaos qu'encamienta a los axentes que s'atopaben curiando al mandatariu nel hospital que lu maten.
  
"Maten rápido a esi fíu de puta de Correa, que lu maten pa que s'acabe esto yá, que s'acabe esta protesta (...). Mátenlu, embósquenlu, dispáren-y", recueye la grabación.
  
Esti mesmu axente encamienta a los sos colegues qu'acaben cola vida del dirixente si se niega a suspender los trámites d'aprobación de la Llei de Serviciu Públicu, qu'elimina les bonificaciones salariales, pola que se manifestó'l colectivu. "Boten bala, nun dexen salir a esi malditu (...), esi 'man' (home) nun sal si nun firma, güei nun sal", calca.
  
Sicasí, tamién s'escucha a otru policía qu'encamienta a los demás a caltener la calma y a nun agredir a Correa. "A ver, compañeros, nun falemos d'asesinatos, somos policíes, somos representantes de l'autoridá, defendamos los nuesos derechos pero esi ciudadanu que se llargue y que dexe de ser presidente", indica.
     
Esta grabación confirma les tesis del Gobiernu, que temió en tou momentu pola integridá física de Correa, que permaneció reteníu per 12 hores nel Hospital de la Policía Nacional hasta que lu rescataron les Fuerces Armaes.

50 deteníos
A lo menos 50 persones resultaron deteníes poles revueltes del pasáu 30 de setiembre n'Ecuador que derivaron nun intentu de golpe d'Estáu, y na so mayoría son xendarmes, oficiales y coroneles que cumplen arrestu disciplinariu en cuarteles policiales.
  
El fiscal de Pichincha, Marcu Freire, confirmó la detención de 34 persones, mientres que l'axencia estatal Andes elevó la cifra a unes 50, que van permanecer en prisión hasta que les citen a declarar.
  
Ente los deteníos alcuéntrase Fidel Araujo, ex militar y militante del partíu opositor Sociedá Patriótica, al que pue vese afalando a los uniformados a sublevase nunes imaxes grabaes poles cámares de seguridá de la zona.
  
Nesta llista ta tamién Pablo Guerrero, que fuere abogáu del ex presidente Lucio Gutiérrez (2003-2005), que participó na toma de la televisión pública con un nutríu grupu d'axentes que causaron importantes daños materiales.
  
A toos ellos van citalos nes próximes hores p'acudir a l'audiencia de formulación de cargos a la so escontra que, previsiblemente, va realizase fuera de les instalaciones de la Policía Nacional por falta d'espaciu.
  
"Antes de les 16.00 de la tarde (23.00 de la nueche n’Asturies), cuando se cumplen les 24 hores, tien que realizase l'audiencia de formulación de cargos, tanto pal señor Araujo como pa toos los policías deteníos", esplicó Freire en declaraciones al diariu dixital 'Ecuador Inmediatu'.
  
Mientres, axentes de la Fiscalía entamaron la reconstrucción de los fechos pa determinar d'ónde procedíen los disparos que se dirixeron contra'l vehículu militar nel que se evacuó al presidente, Rafael Correa, del hospital onde tuvo reteníu mientres doce hores.
  
Nestos llabores participen miembros del Grupu d'Operaciones Especiales (GOE), del Grupu d'Intervención y Rescate (GIR) y del Grupu Especial d'Operaciones (GEO) de les Fuerces Armaes, que reconstruyeron l'escenariu d'estos ataques basándose nos testimonios de los policíes y militares que protagonizaron los fechos.