Día del Llibru Asturianu

Los poemes de Fernán-Coronas sobre la bandera

|
Los poemes de Fernán-Coronas sobre la bandera

El Padre Galo dedicó delles creaciones específicamente al estandarte asturianu, "el nuesu pendón zuleste", y fixo abondes referencies al mesmu na so obra.

Fernán-Coronas (1884-1939), ún de los poetes más destacaos de la lliteratura asturiana, dedicó dellos poemes a la bandera d'Asturies nel primer térciu del sieglu XX, como 'La bandeirísma empeirale', 'Bandeirina, bandeirina' y 'Esventola, esventolexa'. Amás, escribió otros como 'Resucite el Principadu' nel que fala de "llábaru imperiale" o 'Ad signum venite' nel que cita a los "fíus de la zule bandera".

Estos poemes recoyíalos Antón García na so edición de la obra del de Cadavéu, espublizada por Trabe en 1993, 'Poesía Asturiana y Traducciones'.

(Na trescripción respétase la ortografía de la edición d'Antón García, que sigue la orixinal, y que respuende a la variente occidental del asturianu con delles peculiaridaes ortográfiques que reflexen les soluciones escoyíes nes distintes dómines del autor).

LA BANDEIRÍSIMA EMPEIRALE

Pendón zuleste d'Esturias
Qe rayas tal lluz arredol
Tú yas un resume del cielu
Ya tras nesa cruz outru sol.

Pa ti miren guey vint'Españas
Ye digan nun cante de paz
Qel bierzu guardoulu Cuadonga
Y'aquí tién Iberia'l palaz.

Las vinte bandeiras iberas
Avángense todas a tí
Qel sinu haredaste de Playu
Ye quies afiyallas aqí.

BANDEIRINA, BANDEIRINA

Bandeirina, bandeirina
Ni una a lus hombrus te chega
Qu'asta lus cielus avangan
Delantre l'Alfa ya Omega.

Bandeirina, bandeirina
Zulestina cumu'l cielu
Na to azulidade amuesa
La cruz que ya'l sole nuesu

Bandeirina, bandeirina
de todas las bandas xunta
Y'atueta nun solu bandu
Las desbandadas Esturias.

Subre'l picu de Pedrouces
Llanta la bandeira nuesa
Pa que pedrique a todu aire
L'amore de la faliella.

ESVENTOLA, ESVENTOLEXA

Esventola, esventolexa
Zuleste pendón benditu,
Y'envrédanus a Cuadonga
Al monte del grand'aniciu.

Estendarte que tu solu
Vales pur cien estendartes
Ensíñate a lus astures,
Lliévalus a todas partes.

Bandeirina, bandeirina
Del Principadu d'Esturias,
Escuyta bien el sonore
Que dan las nuesas canturias.

Bandeirina, bandeirina,
Retalín d'azul de cielu
D'esvantolar nun apares
Subre'l nuesu verde suelu.

El nuesu pendón zuleste
A ningún pendón s'apande
Qu'outru nu'ay en toda Spaña
De recordanza más grande.

Ixuxú, ya viva, viva,
Viva la bandeira nuesa,
La del primer Principadu,
La bandeira sturiesa.

Deixa, bandeirina nuesa,
Que todus pa ti se viren,
Ya te miren azmiradus,
Ya pur mor de ti suspiren!

Bandeirina que recuerdas
Anicius de gloria nuesus
Atouta a tou arredole
Lus corazus esturiesus!

Pacia ti spúrranse todas
Las manus qu'an defensate,
Ya xuren qu'asta Cuadonga
De trunfu'n trunfu an llevate!

Pacia ti spúrranse todas
Las manus qu'an defendete,
Ya cu'la cruz te saluden
Ya xuren siempre querete.

 

 

Contador Estadistiques