Los planes d’Asturex pal 2012 centren l'actividá de la sociedá en 15 mercaos de cuatro continentes

|

La sociedá mesta d’esportaciones Asturex va desendolcar aiciones con vocación internacionalizadora en 15 mercaos de cuatro continentes a lo llargo del 2012. Pal 23 de marzu tien prevista una misión comercial en Marruecos.

La Conseyería d’Economía y Emplegu informó qu’Asturex yá dispón d’un programa operativu de Promoción Esterior pal 2012 basáu nel incrementu y la diversificación de la base esportadora empresarial y sectorial asturiana, de manera especial nel segmentu de les pequeñes y medianes empreses, col oxetivu d’amenorgar la concentración actual de les actividaes internacionales nun númberu de compañíes y sectores d’actividá reducíu. D’igual forma, busca diversificar xeográficamente’l destín de les esportaciones asturianes, proporcionar los apoyos téunicos y l’asesoría profesional necesaria pa sistematizar los procesos d’esportación y potenciar la cooperación ente les empreses y los sectores asturianos pa ganar en dimensión y posicionamientu competitivu nos mercaos internacionales.

A partir d’estes premises, escoyéronse una serie de mercaos y actividaes que van xirar alredor de trés llinies: programes de fomentu del conocimientu y del interés en mercaos internacionales ente les empreses asturianes (aiciones d’información); d’introducción comercial, consolidación y diversificación de les esportaciones de les empreses asturianes (aiciones de promoción esterior direuta); y d’asesoramientu y apoyu téunicu pa la internacionalización (aiciones d’asistencia téunica). Los mercaos nos que se va actuar esti 2012 son Brasil, Colombia, Perú, Estaos Xuníos, México, Panamá, China, Rusia, Polonia, Benelux, Italia, los países nórdicos, Marruecos, Arxelia y Emiratos Árabes.

Asturex convocó una Misión Comercial Multisectorial a Marruecos pal 23 de marzu que tuvo una gran respuesta ente’l texíu empresarial asturianu, yá qu’un total de quince empreses solicitaron la so participación na iniciativa, según informó la conseyería. L’oxetivu d’esta misión ye consolidar les rellaiciones comerciales y abrir víes de collaboración nueves a les empreses asturianes nel país norafricanu.

 

Contador Estadistiques