Los pilotos d’Iberia convoquen dos xornaes nueves de fuelga pal 9 y 11 de xineru tres el segundu día de paru

|

L’Aeropuertu d’Asturies vivió esti xueves la segunda xornada de fuelga nestes Navidaes de los pilotos d’Iberia, que convoquen dos paros nuevos pal 9 y el 11 de xineru. De los siete vuelos diarios con Madrid, namái salieron dos.
 
Éstos foron los de les 8.35 y 17.45 hores, mentes qu’en direición contraria aterrizaron n’Asturies los que despegaron de Barajas a les 15.55 y 21.25 hores. La mengua de capacidá de los vuelos ente’l nuesu país y la capital castellana algamó’l 70 por cientu pol paru. Mentes, el total de vuelos anulaos pola fuelga a nivel mundial ye 118, el 36 por cientu de los previstos pa esta fecha, de los 59 enllazaben aeropuertos del Estáu español.
 
La estaya sindical del Sepla n'Iberia comunicó güei a la compañía la convocatoria de dos nuevos díes de paru pa’l 9 y 11 del mes qu’entra, según informaron fontes de l'aerollinia y del sindicatu. Los pilotos yá anunciaren de les sos intenciones de continuar cola fuelga en xineru tres nun llegar a un acuerdu cola compañía en socesives xuntes y en protesta a la creación d'Iberia Express, filial ‘low cost’ de la empresa que va garrar delles conexones, ente elles Asturies-Madrid. Dende'l sindicatu califiquen les xuntes calteníes colos responsables d'Iberia como "una comedia".

Contador Estadistiques