Los Picos d'Europa puen tener una población estable de frangüesu

Esta mañana, el Conseyeru de Mediu Ambiente d'Asturies Francisco González Buendía y el d'Aragón Alfredo Boné dieron una rueda de prensa conxunta na que dieron anuncia de la collaboración ente dambes instituciones en materia mediuambiental, sobremanera en xestión de recursos cinexéticos. Sicasí, el mayor interés taba na presencia de Gerardo Báguena, de la "Fundación Quebrantahuesos", quien dio anuncies positives sobre la recuperación del frangüesu nos Picos d'Europa, un proyectu que ta sacando alantre la Fundación en collaboración colos gobiernos autonómicos y al abellugu d'un programa "Life" de la Unión Europea.

La "Fundación Quebrantahuesos" lleva dende va más d'un añu con un proyectu en marcha nel Parque de Los Picos d'Europa pa recuperar al frangüesu, un páxaru carroñeru que llevaba desapaecíu d'Asturies dende va más de sesenta años. Desaniciaos cásique de toa Europa, los frangüesos quedaron arrequexaos a la parte del pirineo, onde s'entamaron va años midíes de recuperación que permitieron que la especie guañare y se llegare a una población de 400 exemplares.

Dende va unos años p'acá, el frangüesu ta recuperando los sos territorios de vieyo, casu de los Picos d'Europa, un llugar onde Gerardo Báguena cree que, d'equí a la vuelta de 10-13 años, puen entamase esperiencies de reintroducción de la especie qu'incluyan la suelta d'exemplares dientro d'un programa que tien de ser, a la fuerza, lentu y nel qu'ha de calculase bien cada pasu enantes de dalu.

Báguena esplicó que según los cálculos colos que trabaya l'equipu asturianu de la Fundación asitiáu en Panes, el Parque de Los picos d'Europa tien capacidá y recursos biolóxicos p'abellugar hasta 45 exemplares de frangüesu, que se repartiríen en sobre 8 pareyes reproductores y cerca d'otros 30 exemplares sueltos pela zona.

Por de pronto, la presencia ocasional d'exemplares de frangüesu, que se detectó por primer vegada va trés años, ye cada añu más alta, y amás los exemplares que vienen hasta equí, anque siguen ensin añerar, echen cada añu más díes en parque de Los Picos. Ello ye que si los primeros páxaros que se vieron echaron n'Asturies ente quince y venti díes, los que vinieron esti añu rexistraron estancies d'ente 90 y 100 díes, lo que ye un datu positivu enforma.

Sicasí, Báguena llamó a la prudencia, y esplicó que pal proyectu col que trabayen nel frangüesu tan optando pel camín más lentu pero trabayando con tolos reconocimientos científicos y afitando un bon resultáu a mediu y llargu plazu. El biólogu, qu'esplicó que ficieron falta cerca de doscientos años pa desaniciar a la especie, polo que'l plazu pa recuperala nun pue ser d'un día pa otru, agradeció la collaboración de les alministraciones autonómiques d'Aragón y Asturies col llabor de la Fundación, que definió como una ONG mediuambiental.