Los Picos d'Europa estrenen directiva ente la crítica ecoloxista

La Comisión Mesta de Xestión del Parque Nacional de los Picos d'Europa alcordó esti miércoles el nomamientu de Jesús Miguel Oria Díaz pal cargu de Presidente del Patronatu del Parque Nacional de los Picos d'Europa. Oria garra'l cargu del tamién cántabru José Luis Gil, y failo col sofitu d'Asturies, que va tar representada nel cargu de director del Parque, qu'ocupa Rodrigo Suárez Robledano, inxenieru de Montes.

El Colectivu Montañeru pa la Defensa de los Picos d'Europa espera qu'Oria "reactive" el parque, pero ve poco democrático'l como s'escoyó'l cargu y condena aspectos de la xestión del parque como la "persecucíon" que se fai col llobu o la falta d'un Plan de Desarrollu Sostenible

Por de pronto, el como se fizo'l nomamientu nun tien el preste de dellos colectivos conservacionistes, como ye'l casu del Colectivu Montañeru pa la Defensa de los Picos d'europa. El grupu que dirixe Avelino Cárcaba argumenta que la Comisión Mesta del Parque asumió competencies que nun-y correspuenden al facer esti nomamientu, en cuantes que la Llei del Parque diz que tien de ser el Patronatu, órganu que'l Colectivu denuncia que "lleva 11 meses ensin aconceyar", el que-y proponga al Ministeriu de Mediu Ambiente un garapiellu de candidatos posibles pa qu'esti decida. P'Avelino Cárcaba, l'escaezu en que ta'l Patronatu supón "una falta de democracia" en cuantes que ye "l'órganu de representación social del parque"

En cuantes a l'actuación executiva que se ta llevando en Parque, el Colectivu Montañeru amenaza cola presentación d'una denuncia énte la Unión Europea pola política de persecución sobre'l llobu ensin un plan de xestión que-y dea cobertura llegal a la muerte d'exemplares y qu'apaute'l marcu de convivencia ente esta especie y el ganao. Los ecoloxistes denuncien tamién los "retrasos inxustificables" nel pagu de les indemnizaciones por daños, que lleguen dacuando a los dos años y que namás ayuden a criar más rocea pa con esta especie

El grupu d'Avelino Cárcaba denuncia que la llinia continuista y d'inactividá del Parque conozse tamién pol retrasu na redacción d'un Plan de desarrollu sostenible, documentu "fundamental" que'l Plan Rector del Parque mandaba que tenía de facese nun plazu d'un añu y que lleva yá dos años y mediu de retrasu. Tamién merez la crítica de los montañeros el retrasu del documentu sobre Réxime económicu del Parque, que tendría d'entrar en funcionamientu xunta'l Plan Rector.