Los pensionistes asturianos rechacen la conxelación de les pensiones

Pensionistes y Xubilaos de CC.OO y UXT y de la Federación d'Asociaciones de Mayores del Principáu d'Asturies (Fampa) acudieron esti xueves a la Xunta Xeneral pa espresar el rechazu a la conxelación de les pensiones contributives pal 2011 aprobada pol Gobiernu.

Según espunxeron, en declaraciones a los medios de comunicación frente al Parlamentu asturianu, la midida va afectar a 3 de cada 4 pensionistes que tán nos marxes de la llenda de la probitú, puesto que más del 50 por cientu tienen pensiones perbaxo de los 600 euros. La conxelación, añadieron, supón una reducción del poder adquisitivu.
  
Los pensionistes asturianos tamién refuguen la reforma del sistema de pensiones plantegada pol Gobiernu na Subcomisión Parlamentaria del Pactu de Toledo, por tratase d'un "meru recorte" qu'en nada va contribuyir a la solidez y consolidación del sistema fiscal.
  
El secretariu xeneral de la Federación de Pensionistes y Xubilaos de CC.OO d'Asturies señaló que los argumentos del Gobiernu "pa executar esos recortes" en materia de pensiones nun son veraces. Ello ye qu'esplicó que la financiación de les pensiones recai básicamente nes cotizaciones sociales qu'en nengún momentu, hasta nos periodos de crisis, xeneraron déficit.
  
"Nun fuimos a Harvard, pero nun somos 'gilipollas'", señaló, y dixo qu'existen "augurios interesaos" pa que los ciudadanos recurran a planes privaos de pensiones. Esplicó que los superavit de la Seguridá Social por cotizaciones sociales tán valiendo pa financiar "otres prestaciones y servicios de carácter universal que correspondería cubrir colos ingresos del Estáu, vía impuestos".
  
N'España, añadió, gástase'l 9 por cientu del productu interior brutu (PIB) en pensiones. Una cifra que contrasta colo que se gasta en países como Francia, Italia o Alemaña, onde gasten ente'l 14 y el 15 por cientu.