Selmana de les Lletres Asturianes

“Los partíos nun pueden caer na falacia de qu’un diputáu diga que nun entiende l’asturianu”, alerta Iniciativa

|
Xunta Xeneral escudu fachada por Denis Soria

“Tán buscándose soluciones a un problema que nun esiste y al mesmu tiempu se ta cayendo nuna trampa pa politizar la llingua asturiana”, alvierte Iniciativa pol Asturianu al respeuto del alderique “absurdu” sobre l’usu del idioma na Xunta Xeneral. “Los partíos nun pueden caer na falacia de qu’un diputáu diga que nun entiende l’asturianu. Una reforma del Reglamentu nun puede basase nuna mentira”, añade.

La organización, consciente de que la decisión que se tome agora va marcar les actuaciones nel futuru nel Parllamentu, haya o nun haya oficialidá, reclama esclariar yá la situación. Recuerda que dende l’añu 1991 ta presente l’usu del asturianu na Xunta Xeneral, ensin problemes, y apunta qu’agora la institución tendría qu’articular l’usu del idioma en base a la llibertá y non como se ta plantegando.

D’igual forma encamienta a los partíos que defenden la oficialidá a “dar un pasu allantre y frenar los intentos de VOX pa torgar los drechos de los y les falantes d’asturianu. Ye’l turnu de la mayoría a favor de la llibertá y de la diversidá. Esa mayoría nun puede dar pesu y poder a les discriminaciones y a les mentires”.

Tamién reclama que “la mayoría parllamentaria a favor de la oficialidá seya valiente y trabaye en pro de la llibertá y se ponga a trabayar en serio nuna reforma que garantice la plena igualdá de los drechos llingüísticos sumando al mayor número de votos favorables posibles, que ye lo que reclama la sociedá y que recueye la Constitución Española nel so artículo 3.2”.

Cursu de baldre pa diputaos

Una vegada más, Iniciativa pol Asturianu úfrese pa poner cursos de baldre d’asturianu a los diputaos y trabayadores de la Xunta Xeneral. Con esta propuesta la organización busca que “los representantes políticos de tolos asturianos y asturianes s’animen a usar l’asturianu”.

Semeya obra de Denis Soria baxo llicencia CC BY-SA 3.0.

Contador Estadistiques