Los partíos de Segunda van poder siguise en llingües cooficiales y en delles plataformes

Los choques del Sporting y del Uviéu nun van emitise n'asturianu en LaLiga SmartBank TV al nun tener l'idioma esti reconocimientu llegal.

A 12 díes del entamu de la competición, les aficiones de los dos equipos del país por fin resuelven la dulda d'ónde y cómo van poder ver los partíos de fuera de casa. Los clientes de Movistar y Orange van poder siguilos como hasta agora nes sos plataformes, mentes que Telecable recupera la categoría, anque se desconoz entovía les posibles tarifes.

A partir de setiembre habrá diferentes posibilidaes pa siguir la temporada, yá que la canal nueva LaLiga SmartBank TV va tar tamién disponible n'Amazon Prime Video, Euskaltel, R, Virgin Telco, MásMóvil, Yoigo y Guuk. Un cambiu importante na emisión de la Segunda División per televisión cola que LaLiga pretende rentabilizar la categoría depués de que la puya polos sos derechos n'esclusiva quedara vacía.

Comentaristes con pasáu roxiblancu y azul

Los dos meyores partíos de cada xornada amás van poder siguise en canales de les tarifes básiques de cada plataforma, caso de Vamos en Movistar. Nel equipu de comentaristes de la competición tán los ex porteros del Sporting y del Uviéu, Alberto y Esteban, de manera respeutiva, o'l tamién ex azul Carreras.

Ún de los aspeutos destacaos por LaLiga pa LaLiga SmartBank TV ye la ufierta de "la opción al usuariu d'acceder a la narración y comentarios de la retresmisión en toles llingües cooficiales naquellos territorios con llingua cooficial". Al nun tener l'asturianu esti reconocimientu llegal, los aficionaos del Sporting y Uviéu nun van poder siguir los partíos de los sos equipos na llingua propia.

Na semeya, una cámara sigue'l xuegu nel últimu partíu de Lliga xugáu n'El Molinón.