Los partíos d'ámbitu asturianu toquen fondo énte la inminente reforma estatutaria

Una de les consecuencies de les pasaes elecciones europees ye'l periodu de reflexón y redefinición del espaciu nacionalista y la constatación de lo feble d'esti ámbitu electoral después de los resultaos algamaos poles formaciones d'ámbitu asturianu que se presentaben el 13-X.


Ensin dulda la noticia que más rescampla ye'l desastre del PAS que s'asitia nun porcentaxe marxinal, el 0'38% y malapenes 1.600 votos, el peor resultáu de la so historia en cualquier elección. Otra de les noticies ye qu'Andecha Astur, a la espera de conocer el votu emigrante, perpasa en votos al Partíu Asturianista, anque nun ye quien a algamar el 0'4% del votu nin a sacar tayada electoral del argayu del PAS. En términos xenerales el votu a opciones non estatales nun aporta al 1% nel so conxuntu, el porcentaxe más baxu de la so historia. Namás nel añu 1979 nel que'l Conceyu Nacionalista Astur sacó 3.049 votos y el 0'59% y nel añu 1983 cuando l'Ensame Nacionalista Astur algamó 2.505 y el 0'44% (nos dos casos yeren los únicos partíos d'esta mena que se presentaben) el nacionalismu asturianu tuvo un porcentaxe más baxu que nes últimes elecciones europees, anque en delles elecciones nun hubo presencia nacionalista.

No que toca a les elecciones europees, desque estes cuenten con presencia de partíos d'ámbitu estrictamente asturianu, tamién alcontramos el porcentaxe más baxu . Nel añu 1.989 PAS, que se presentaba na coalición Izquierda de los Pueblos, y UNA sumaben 10.075 votos y más del 2% porcentual mentes que cinco años más tarde, nel añu 1999, el PAS recoyía 9.769 votos y el 1'79%. Nel añu 1999 los asturianistes algamaben 10.693 votos, baxando hasta'l 1'73%, nunes elecciones nes que tamién se presentó Andecha Astur, que tuvo 1.467 votos (0'24%) y la URAS (18.579 y el 3'01%).


Les cifres del descalabru de les opciones asturianes canten y nun pueden siquiera maquillase col posible tresvase de votos a otres opciones como IU-Bloque por Asturies. Esta opción, apoyada dende dellos sectores asturianistes y única defensora de delles posiciones como la oficialidá na Xunta Xeneral, nun algama los 28.000 votos y queda perbaxo del 7% nun de los sos peores resultaos n'Asturies de tola so historia.
Una de les consecuencies inmediates d'estes cifres ye la falta de capacidá de presión política pa la incorporación de posiciones defendíes históricamente por estos partíos, como la oficialidá de la llingua asturiana, nuna reforma del estatutu na que l'asturianismu va tener que defender na cai, y atropando apoyos nel mundu cultural y social, posiciones que son asumíes pola sociedá del país pero que nun son quien a afitar formaciones polítiques consolidaes.