Los partíos convoquen actos pal so 8 de setiembre

IU-Bloque por Asturies, Andecha Astur, Izquierda Asturiana y el Partíu Asturianista y Uras de forma conxunta, entamen los sos actos pa celebrar el día d'Asturies esti miércoles.

Convocatories de distintu calter son les qu'organicen les formaciones polítiques de corte asturianista. Güei IU-Bloque por Asturies y la organización Lliberación presentaron la so axenda pa esti día. El secretariu d'organización d'IU Guillermo Ballina presentó estos actos colos que quieren que'l gobiernu asturianu "s'identifiquen cola cultura y la llingua asturianes". Estos actos van desenvolvése nel Parque los Pericones de Xixón a partir de les 12:30. D'esta manera IU-Bloque desmárquense de los actos del gobiernu, anque la coalición quixo dexar claro que nun ye un enfrentamientu, argumentado que "anque IU forme parte del Executivu trátase d'una fuerza política distinta". Pela so parte el representante del "Bloque por Asturies" Francisco Álvarez comentó que la so formación política nun va particpar nos actos del gobiernu "pol olvidu sistemáticu de dalgún sector de los socialistes asturianos de la cuestión llingüística".

El PAS y URAS celebren conxuntamente esti día con un actu en Xixón a les 12:30 de la mañana frente a la estatua de Pelayo na plaza'l Marqués. Esti actu conxuntu forma parte del procesu que tan llevando alantre les dos formaciones d'averamientu. Dempués del actu va haber una comida tamién conxunta onde van intervenir Sergio Marqués por (URAS) y Xuan Xosé Sánchez Vicente pol (PAS).

Andecha Astur pela so parte entama la so tradicional manifestación peles cais d'Uviéu. Esta vegada col llema "Asturies tamién tien drechos", la manifestación va salir a les 13 hores del Paséu los Álamos, arrodiará'l Campu San Francisco y la Xunta Xeneral d'Asturies, pa finar na Plaza la Escandalera. Dempués va haber un actu políticu onde van intervenir Santiago Artime Sánchez, conceyal d'Andecha Astur en Carreñu, y David Manuel Rivas Infante, candidatu por Andecha Astur a la Presidencia d'Asturies en 2003. Tres les intervenciones polítiques espicha popular na Plaza'l Paragües, que va sirvir como presentación pública de l'asociación xuvenil independentista "Darréu".

Pela so parte IAS (Izquierda Asturiana) vuelve a celebrar el día d'Asturies en Piloña con una espicha-mitin. Concretamente Sebares ye'l llugar escoyíu va aconceyar a la militancia y los simpatizantes d'esta formación, que tien en Piloña una de les sos agrupaciones más curioses.