El 25 de marzu próximu van celebrase eleiciones nacionales anticipaes, convocaes por Francisco Álvarez-Cascos el 30 de xineru. Esta selmana los partíos y coaliciones han de presentar los sos representantes ante la Xunta Eleutoral.
 
En concreto, la fecha tope pa comunicar a la Xunta Eleutoral la intención de participar nes eleiciones termina’l miércoles, yá que, según marca la Llei 14/1986, del 26 d’avientu, sobre réxime d’Eleiciones a la Xunta Xeneral del Principáu d’Asturies, el plazu fina’l novenu día posterior a la convocatoria. Otra manera, el vienres habría que confirmar les alliances eleutorales posibles enantes del meudía. Ello dexa un marxe mui pequeñu a los partíos a la hora d’establecer coaliciones ente formaciones, yá que la decisión d’Álvarez-Cascos de disolver el Parllamentu, pese a que yera una posibilidá real, sorprendió a toles agrupaciones.
 
Nel terrén asturianista, los partíos celebraron conceyos la selmana pasada pa tomar posiciones de cara a la cita coles urnes del 25 de marzu. La primer noticia yera la decisión del PAS de nun presentase a les eleiciones, fechu que nun echa atrás a la URAS, los sos compañeros de coalición nestos años últimos, que sí van formar llista eleutoral. Mentes, Bloque por Asturies y Unidá Nacionalista Asturiana (UNA) aprobaron dir xuntos, al igual que nes eleiciones de mayu.
 
Sicasí, les negociaciones ente formaciones nun ta pesllada. Esta tarde va haber un conceyu entre representantes de Bloque y UNA colos d’otres organizaciones pa valorar si pue ampliase la coalición con otres fuerces, respondiendo asina a una demanda grande del electoráu. Mesmamente, ayeri diose a conocer una “carta abierta al asturianismu, al nacionalismu asturianu, a los movimientos sociales, ecoloxistes y a tola sociedá asturiana”, roblada por doce persones del ámbitu asturianista, na que se reclama “la presentación nos prósimos díes d’una única y amplia coalición eleutoral de la que formen parte tolos partíos asturianistes, nacionalistes d’esquierdes, verdes, a la que se sumen persones independientes y organizaciones sociales. Pidimos que nun haya esceiciones, escaecer el pasáu y que se faiga un exerciciu de responsabilidá política pa ver lo esencial: presentar una alternativa política dende Asturies pa solucionar los problemes d’Asturies”. Los firmantes d’esti documentu son Mariu Arbesú, Fernando Ornosa, Antón Fuertes, Inaciu Llope, Iyán González, Xune Elipe Raposo, Xulio Llaneza, David Rivas, Dulce Xil, Xosé Ambás, Xicu Mata y Pablo Pérez.
 
Candidatos de los partíos parllamentarios
 
Ente los partíos con representación parllamentaria, paez que nun va haber sorpreses no que respeuta a la presentación de candidatos, a esceición del Partido Popular que, pa tratar de recuperar el terrén perdíu en mayu, paez que va apostar pola diputada Mercedes Fernández en cuenta d’Isabel Pérez-Espinosa. Poro, repetiríen como candidatos a la presidencia del país Francisco Álvarez-Cascos (FAC) y Javier Fernández (PSOE). Les llistes definitives han de presentase ente’l 14 y el 19 de febreru.
 
No que respueta a Izquierda Xunida (IX), too paez indicar que Jesús Iglesias va repetir como cabeza de llista, anque queda por ver si IX se presenta en solitariu o con Equo, yá que los sos socios en mayu, Los Verdes d’Asturies, integráronse l’añu pasáu nesti partíu de calter estatal.