Los partíos con representación na Xunta siguen ensin llegar a alcuerdos pa la constitución de la Mesa

Esti miércoles, a les 12 hores, va constituyise la Xunta Xeneral y los partíos tovía nun avanzaron nes negociaciones pa formar la Mesa de la Cámara. Ye posible que nun lleguen a alcuerdos hasta’l mesmu día de la votación.
 
Dende’l PP y Foro Asturias Ciudadano (FAC) aseguraron que “a lo llargo de la xornada nun se produxo nengún avance nin averamientu ente ambes formaciones” y namái quedaría’l martes y la mañana del miércoles p’algamalu. Na sesión constitutiva de la Xunta Xeneral va decidise los cinco miembros de la Mesa de la Cámara formada pola presidenta, dos vicepresidentes y dos secretaríes.
 
Na llexislatura anterior los socialistes presidíen la Mesa y teníen amás la secretaría primera, mentes qu’IX-Bloque por Asturies-LV ocupaba la vicepresidencia primera y el PP, la segunda y la otra secretaría. La propuesta de FAC pa esta llexislatura ye la de quedase la presidencia y vicepresidencia primera, mentes que’l PSOE tendría la vicepresidencia segunda; el PP, la secretaría primera; y IX-LV, la secretaría segunda. Les otres tres formaciones con representación nun tán d’alcuerdu cola ufierta del partíu presidíu por Francisco Álvarez-Cascos.