Los paneles informativos de Llangréu y Mieres van recuperar l’asturianu

Fomentu va sustituyir los cartelos d’entrada a Llangréu y Mieres que perdieren l’asturianu por otros billingües. Iniciativa pol Asturianu cree urxente’l Plan de Normalización pa torgar estes situaciones.

La organización recibió una respuesta a la so reclamación, firmada pol conseyeru Alejandro Calvo, nel qu’esplica que les señales anteriores taben puestes polos propios conceyos, con diseños diferentes según el llugar, y qu’agora hai instrucciones de colocar paneles informativos uniformes en toles carreteres de titularidá autonómica. Nesi sen, confirma que’l Serviciu de Conservación y Esplotación de Carreteres va sustituyir los cartelos denunciaos a la entrada de Llangréu y Mieres por otros billingües onde apeaza tamién 'Conceyu de'.

D’igual forma, l’escritu comunica que “Infraestructures y Normalización Llingüística tán en contautu y que se tien previsto oficializar los nomes de los conceyos, hai 38 susceptibles de modificar, procesu que s'iniciará proximamente”, rellata Iván Llera, presidente d’Iniciativa pol Asturianu, que valora “la rapidez na respuesta. Esperamos qu’a partir d’agora s’aplique’l criteriu de que l’asturianu tea siempre presente nes señales. Eso ye lo deseable y vamos tar vixilantes pa que se cumpla”.

Necesidá de tresversalidá na normalización

Llera cree “imprescindible qu’haya un Plan de Normalización pa esti mandatu” que torgue esti tipu de situaciones, “porque da la sensación que se ta dexando p’aplicar nel siguiente”, y que “garantice qu’haya tresversalidá nes polítiques de normalización y nun tengamos que tar siempre con escritos pa que cumplan lo que tenía que salir d’ellos”.