Los padres de fíos que nun puen recibir asturianu faen una asociación

Ayeri presentóse na sé del sindicatu d'enseñanza SUATEA l'Asociación de Families pola Escolarización n'Asturianu. Esta asociación nueva quier representar a les families afectaes
Pola situación actual na que munchos neños y neñes nun puen recibir enseñanza d'asturianu porque nun hai'l mínimu d'alumnos que manda l'alministración pa pone-yos un mayestru. L'asociación califica esta situación de "conculcación de los drechos llingüísticos nel sistema
Educativu" y entiende que la Conseyería d'Educación incumple la llexislación vixente en materia de derechos llingüísticos d'ámbitu internacional, estatal y asturianu. Énte esta situación, l'asociación pide que se reconoza la oficialidá del asturianu y qu'esta s'acompañe d'una llei d'escolarización de la llingua. Na opinión de l'Asociación, l'actual gobiernu de PSOE y IX incumple la llei d'usu y el mesmu pautu de gobiernu al torgar el derechu a recibir clase d'asturianu nuna o en toles etapes educatives del sistema.


La idea pa crear l'asociación salió d'Arturu Xosé Bermeyu y Dulce Mª Xil, padres de Catuxa Bermeyu, que quixeron matricular a la so fía Catuxa n'asturianu pero vieron como'l centru la empobinaba pa clas de francés en cuantes que la llei nun obliga a facer grupu d'asturianu nun habiendo un mínimu d'ocho alumnos que lo pidiere. Otru de los miembros de l'asociación ye l'empresariu José Suárez Arias-Cachero, que tien un fíu n'Educación Infantil y pal que pidió l'asignatura d'asturianu, pero l'Alministración educativa sigue ñegándo-y esi derechu. Llucía Menéndez, otra de les socies, tien un fíu nun Institutu onde sí hai asignatura d'asturianu, pero tien otru pequeñu pa entamar Educación Infantil que nun va poder recibir asturianu .