Los otros músicos asturianos de los premios de la SGAE

Asturies nun va tar solo presente nos Premios de la Música col meyor cantar n'asturianu. Discos y artistes asturianos tán tamién presentes n'otres categoríes. Tarañu, Escuela de Odio, De Ñublu y Orpín o Paco Loco son dellos exemplos de la gran presencia asturiana nos premios de la SGAE.

Los Premios de la Música qu'entama l'Academia de la Música, entidá venceyada a la Sociedá Xeneral d'autores y executantes (SGAE), tienen 19 categoríes distintes dende la de meyor álbum hasta la de meyor programa musical de televisión. Les llistes de candidatos en toes estes categoríes tán chiscaes de nomes asturianos, qu'apaecen en coses tan estremaes como Autor Revelación, Meyor Álbum Nueves Músiques o Meyor Producción Artística.

Dellos nominaos na categoría de meyor cantar n'asturianu tamién apaecen n'otres categoríes, como ye'l casu por exemplu de Tarañu, que xunta la Banda de Música de Villaviciosa, podemos velos nominaos a meyor álbum de música tradicional y meyor álbum, categoría ésta última onde tamién tán Deua Dubra, Skanda, Avalanch y Victor Manuel.

El l'ésitu del rumberu Melendi fai qu'apaeza en trés categoríes, Autor revelación, meyor cantar y meyor videu musical, anque en númberu de nominaciones ta igualáu Ramón Prada que tamién ta en trés llistes, meyor productor artísticu, meyor álbum nueves músiques y meyor técnicu soníu, toes pol so discu "Veinte canciones de amor y un poema desesperado".

El rock ta representáu esti añu cola presencia d'Avalanch, en meyor álbum y meyor álbum de Rock, y Escuela de Odio qu'apaez en meyor álbum de rock alternativu. N'otru estilu musical bien diferente topamos a los vocalistes de la cantata a Andrés Solar "Solar d'amor y arume verde", en meyor interprete de música clásica.

La categoría onde más nomes del país topamos ye na de meyor productor artísticu, onde hai xente conocío y otros non tanto por ser esti un llabor que nun se fai de cara'l públicu. Ello ye que tenemos ehí a Paco Loco pol discu de los "Excursionistas", a Mª Carmen Valverde pol "Soyáu Mardana" de Deua Dubra, a Chus Pedro y Gabino Antuña pol "De Ñublu y Orpín", a Carlos José Martínez pol "Solar d'Amor" y l'incansable Victor Manuel San José por "Neruda en el Corazón".

La llista de nomes continua con Gabino Antuña, esta vegada na categoría de meyor arreglista pol discu de Chus Pedro. P'acabar, y yá en cuestiones más técniques, na categoría de meyor técnicu de soníu ta José Luis Contreras pol "Solar d'Amor y Arume Verde", y Juanjo González, que compite nesta categoría con trés discos, el "Soyáu de Mardana", "Lux Aurumque" del Coro el León de Oro de Lluanco y "De Ñublu y Orpín" de Chus Pedro, que d'esta manera iguala a Ramón Prada y Melendi apaeciendo en trés categoríes.