Los otros indianos

La memoria de la emigración asturiana a los Estaos Xuníos d'América nunca nun tuvo tan vivo como agora. Va delles selmanes, anunciábemos l'apaición d'una web, asturianus.org, que rescataba la esistencia d'esta emigración a trabayar nes mines y industries del zinc y el metal na norteamérica del primer terciu del sieglu.

Ello ye que en bien pocu tiempu, esta páxina ta convirtiéndose en puntu d'alcuentru pa esta comunidá astur-americana qu'anda espardía mayormente pel estáu de Virginia y pa los parientes que quedaron n'Asturies. Internet ta valiendo asina pa recuperar histories familiares que llevaben tiempu escaecíes y ta convirtiéndose de pasu nuna fonte d'información de primer interés pa los historiadores interesaos en recuperar la memoria d'esa parte tan particular de la emigración asturiana, una emigración hasta agora mui poco conocía y que dende llueu nun concueya col conceptu clásicu del indianu -yá fuere afortunáu o volviere probe- qu'emigraba a América del Sur.

Pero ye que amás Asturianus.org ta funcionando como una canal de comunicación pela que se pasa información en dambos sentíos y de munchos temes distintos, como ye tamién la recuperación de la historia de los propios llugares d'onde salieron los emigraos. les circunstancies que los llevaron al otru llau de la mar y les condiciones de vida y trabayu nel Arnao de primeros del XX. Esti artículu del web Avilés en la Historia aporta bien de datos interesantes pa siguir la llinia d'una historia que ta escribiéndose agora