Los nomes y apellíos de la "lleenda urbana"

L'afirmación del presidente asturianu na presentación d'un estudiu sobre empleabilidá de los universitarios asturianos de que la idea xeneralizada qu'esiste de que la mocedá asturiano más preparao tien qu'emigrar p'alcontrar trabayu ye una "lleenda urbana" ta alcontrando la oposición política de los sos socios de gobiernu, al traviés de la quexa de la diputada Diana Camafeita, y tamién la de la mocedá asturiano emigrao. El buzón eléctrónicu d'Asturies.com recibió a lo llargo d'estos últimos díes bien de mensaxes d'asturianos emigraos que decidieron demostrar el so enfadu poles declaraciones d'Álvarez Areces.

A lo llargo d'estos díes, al corréu electrónicu de la nuestra redacción llegaron correos d'asturianos emigraos lliteralmente "plasmaos" énte les declaraciones del Presidente. Los más d'estos correos, que van dirixíos tamién directamente a la persona del Presidente asturianu, sorrayen que la decisión d'abandonar Asturies pa trabayar fuera foi en tolos casos por obligación y nunca voluntaria y forzada en tou casu pola imposibilidá d'alcontrar trabayu n'Asturies o poles condiciones llaborales que se-yos poníen n'Asturies. D'otra manera, tolos testimonios concueyen na condena a los términos en que s'espresó'l presidente Areces y munchos d'ellos entren directamente a cuestionar la seriedá del informe d'empleabilidá de los universitarios asturianos del que salieron les declaraciones del presidente asturianu.

Asina, Pilar Canella, llicenciada en Matemátiques y que trabaya en Madrid n'Iberia, esplica que "tolos compañeros que consiguieron espedientes meyores que'l míu tan trabayando fuera ensin escepción, y los que lu tienen peor, la mayoría tamién". Esta emigrada asturiana en Madrid diz que considera "un insultu" les palabras del presidente y recuerda, en rellación a la idea que s'apuntó na presentación del estudiu de que marchen los estudiantes con peor espediente que "amás d'ignoranos pretende humíllanos faciendo alusión a la precariedá del nuestro espediente".

La seriedá del estudiu cuestiónase dafechu. Iván Lora, asturianu en Madrid, diz que "como pueden facer un estudiu a midida pa tapar el problema de la emigración forzosa en cuenta de gastar el dineru n'intentar solucionalo. Amás faen una interpretación de los datos totalmente interesada". Tamién dende Madrid, otru asturianu convida a Areces a dir a conocer la realidá y diz que "Si valemos para trabayar nel BBVA, nel INTA, en Banesto, en medios de comunicación como Recoletos o Prisa, en grandísimes empreses que reconocen el nuestru trabayu y la nuestra personalidá, por qué nun vamos valer pa les empreses asturianes".

Dellos asturianos que tan en Madrid y otres comunidaes del estáu llamen l'atención nes sos cartes sobre'l fechu de que, anque viven fuera, decidieron siguir empadronaos n'Asturies pa poder votar, pero replantéguense mui seriamente'l seguir asina otru añu más.

En cuantes a la comparación ente'l mercáu llaboral n'Asturies y fuera los testimonios son especialmente duros. Pilar Canella remembra que "Cuando terminé la carrera intenté por tolos medios conseguir trabayu, nun m'importaba de lo que fuere y trabayé de vendedora, de profesora particular, dalministrativa pa una constructora, de dependienta nuna tienda... pero nos más de los casos en sin contratu llaboral". Alejandro González Artime, asturianu en Madrid y encargáu del sistema de programación d'horarios n'Iberia diz "llicencieme en Ciencies Matemátiques y resulta curioso pensar cómo una carrera que tien tan pocu paru n'España nun tien ningún tipu de mercáu llaboral n'Asturies".

Anque los más de los testimonios qu'aportaron hasta la redacción d'Asturies.com vinieron dende Madrid,danse casos d'emigrantes que tan en llugares tan llonxanos como la China. De cualquier manera, paez que la cosa nun va quedar nel enfadu puntual, y emigrantes colos que se punxo en contactu Asturies.com esplicaron que ta trabayándose nun escritu común informando y denunciando la situación de la emigración de la mocedá asturiano, falándose incluso de la posible creación d'una asociación que podría llamase EMAS "Emigrantes por Asturies" .