Los nomes de los asturianos

La Sociedá d'Estudios Económicos Asturianos (SADEI) ta acabante de colgar na rede una estadística enforma curiosa na que se recueye la evolución de la antroponimia asturiana dende primeros del sieglu XX hasta anguaño. El llistáu del SADEI parte del estudiu de los padrones y amuesa la evolución de los vezos a la hora de pone-yos nome a les criatures.

Ente los homes, el nome más emplegáu ye con muncho'l de "Manuel" que recibieron 18.008 asturianos dende 1900 hasta agora, mientres qu'un deriváu d'esti, José Manuel, gastáronlu otros 15.717 asturianos. El tercer nome na llista "Jose" sal acompangando munches de les fórmules compuestes que salen más arriba na llista, dando asina "Jose Antonio" o "José Luis".

Viendo la llista conozse como la moda y el pasu del tiempu alteren los vezos antroponímicos. Asina, mientres hasta bien metíu'l sieglu XX yera mui común ver "Laureano" "Maximino" "Marcelino" o "Olegario" la etapa posfranquista sorpréndenos con un báramu de nomes d'importación tipu "Kevin" o "Jonathan" y una xuba de nomes de raigón bíblicu tipo "Mateo" o "Abraham" mientres que la posibilidá de rexistrar nomes n'asturianu va caltriando col tiempu afita la presencia na llista de los 100 más emplegaos del nome "Iyán" en dos grafíes, con "y" y con "ll", entrando tamién desde los 90 el nome "Enol".

Ente les muyeres, la evolución ye asemeyada en llinies xenerales. Ente elles, el nome históricamente más emplegáu ye'l de "María del Carmen" mientres que la forma compuesta con María apaez en munchos de los nomes de la llista, siendo asina "María Luisa" "María Teresa" "María del Pilar" o el nome de la hermana de Xovellanos "María Josefa" dellos de los que más salen ente los venti primeros.

Na evolución histórica, el reblagu que se da dende los años 80 tamién ye grande. Nomes como "Etelvina" "Honorina" o "Palmira" caen de la llista y dexen pasu a empréstamos, los más d'ellos ingleses casu de "Sheila" o "Desiree" mientres qu'otros munchos, sobremanera son vascos, casu de "Aitana" o "Ainhoa", una tendencia que tamién se da nel rexistru de nomes masculinos, que s'enllena dende losaños 70 de neños que se llamen "Aitor" .

Xunta un bon númberu de nomes d'estrañu aniciu ("Naiara" o "Saray") los llistaos de los 90 y 2000 espeyen tamién los primeros nomes n'asturianu, con bien de neñes que se llamen "Llara".

El llistáu enteru pue consultase nel web del SADEI