Los nacionalistes escoceses algamen la mayoría absoluta nel Parllamentu

El pueblu escocés dio-y la mayoría absoluta al Scottish National Party (SNP) nes eleiciones parllamentaries celebraes nesti país baxo soberanía inglesa. Ello va abrir les puertes a la convocatoria d’un referéndum sorbre la independencia d’Alba.
 
El SNP yá venía gobernando en Escocia dende’l 2007 con un Gobiernu en minoría, situación que camuda enforma tres les eleiciones del xueves pasáu. El partíu nacionalista llideráu por Alex Salmond consigue sumar una mayoría absoluta que nin les encuestes nin los analistes políticos predixeron y que permite al primer ministru del Parllamentu escocés cumplir la so promesa de celebrar una consulta pa conocer si’l pueblu d’Alba quier dixebrase o non del Reinu Xuníu, estáu del que tamién formen parte Inglaterra, Cymru (Gales) y l’Ulster, amás d’otres naciones celtes como Kernow (Cornualles) y los territorios británicos d’ultramar.
 
Na cuarta convocatoria eleutoral dende que se creara’l Parllamentu escocés nel 1999, el SNP algamó 69 escaños, 23 más que na anterior. La segunda fuercia más votada foi el Labour Party, los llaboristes, con 37; y la tercera, el Conservative and Unionist Party (15), la formación política de David Cameron, primer ministru británicu. Tamién van contar con representación los Liberal Democrats (5), los independentistes-verdes del Pàrtaidh Uaine na h-Alba (2) y la nacionalista independiente Margo MacDonald.
 
En Cymru, onde tamién hubo eleiciones, les noticies pa los independentistes nun foron tan positives como n’Alba y el Plaid Cymru perdió 4 escaños pa situase con 11. El ganador de les eleiciones nel País de Gales foi’l Labour Party, con 30 escaños, mentes que’l Conservative and Unionist Party algamó 14 y el Liberal Democrats, 5. Estos resultaos podíen dexar a los nacionalistes fuera del gobiernu de l’asamblea galesa.
 
El Sinn Féin n’Irlanda del Norte, pela so parte, sumó 29 escaños –ún más que nel 2007– polos 38 del Democratic Unionist Party. Tamién cuente con representación l’Uster Unionist Party (16), el SocialDem&Labour Party (14), l’Alliance Party (8), el Green Party (1), el Traditional Unionist Voice (1) y un independiente.
 
Otra manera, na xornada tamién se votó en tol Reinu Xuníu –n’Inglaterra tamién había municipales– un referéndum sobre una reforma eleutoral a propuesta de los Liberal Democrats, que recibió’l refugu d’un 67,9 por cientu de los votantes. Los ‘libdems’ consideren que’l sistema actual ye perxudicial pa los sos intereses y la consulta yera ún de les condiciones del pautu de gobiernu col partíu conservador de Cameron.