Los nacionalistes corsos ganen les eleiciones con mayoría absoluta

Les sos reclamaciones principales son autonomía pa la isla y la oficialidá del idioma.

La coalición soberanista Pè a Corsica, creóse nel 2015 polos independentistes Corsica Libera y los autonomistes Femu a Corsica, cuando ganaron les eleiciones corses. Dos años depués, nes llexislatives franceses, sumó 3 de los 4 diputaos que-y correspuenden a Corsica na Assemblée Nationale, ésitu que completen agora cola mayoría absoluta na segunda vuelta de les eleiciones territoriales del domingu.

Tres algamar un 45,36 por cientu na primer vuelta, na segunda la llista liderada pol autonomista Gilles Simeoni sumó un 56,46 por cientu, sumando 41 de los 63 escaños del Parllamentu. La segunda fuercia ye la derecha rexonalista comandada por Jean-Martin Mondoloni, con 10 diputaos (18,30 por cientu).

Completen l'Assemblea di Corsica'l el partíu que gobierna Francia, La République en marche!, con 6 representantes (12,63 por cientu) y la coalición ente Les Républicains y el Comité Central Bonapartiste, tamién con 6 (12,59 por cientu). La participación foi del 52,55 por cientu.

Xunión de los dos departamentos

El Parllamentu nuevu de Corsica naz tres la fusión de los dos departamentos nos que se dividía la isla mediterránea. Dende l'Assemblea, Pè a Corsica va trabayar por algamar l'autonomía pal país nos 3 años próximos, amás de la oficialidá del corsu y otres demandes incluyíes nel so programa eleutoral, como la vuelta a Corsica de los presos del Fronte di Liberazione Naziunale Corsu (FLNC).