Los más de 150 años del Muséu Arqueolóxicu rellátense nun llibru

L’arqueólogu José Antonio Fernández de Córdoba ye l’autor de la ‘Historia del Museo Arqueológico de Asturias’, llibru coeditáu pol Gobiernu y Impronta que rellata los más 150 años de la institución, en concreto dende la so fundación nel 1844 al 1996. La obra permite facer un viaxe al traviés de la historia de la arqueoloxía nel país nesti tiempu.

El testu, en castellanu, pon una atención especial n’esplicar la formación de la coleición actual y en dexar constancia de les persones que caltuvieron un venceyu relevante col muséu, de manera especial los sos conservadores y los principales donantes de pieces. El llibru tamién s’ocupa de les diferentes sedes qu’ocupó nestos 150 años, como’l convento de San Francisco d’Uviéu, el patiu central de les Escueles Normales de la cai Uría, los baxos de casa del deán Payarinos –edificiu qu’ocupa anguaño’l conservatoriu y, finalmente, el monasteriu de San Vicente.

Otros conteníos de la ‘Historia del Museo Arqueológico de Asturias’ son les esposiciones permanentes y les rellaciones con otras instituciones, sobre manera la Comisión de Monumentos d’Asturies y el Serviciu d’Investigaciones Arqueolóxiques, del que s’ofrecen novedaes importantes sobre la so historia. Inclúi tamién una aproximación a la formación de la so biblioteca y al montaxe museográficu de la celda del Padre Feijoo.

L’orixe del Muséu Arqueolóxicu d'Asturies ta na obligación de la Comisión de Monumentos d’Asturies de recoyer les pieces más relevantes procedentes de la desamortización, un llabor que los sos promotores ampliaron a los oxetos más significativos pa ilustrar la historia del país. Al frente de la institución tuvieron personalidaes destacaes y venceyaes col estudiu de la historia y la cultura, como’l historiador Ciriaco Miguel Vigil, el profesor de la Universidá d’Uviéu Fermín Canella Secades o l’escultor Víctor Hevia Granda, y, a partir del 1952, y hasta'l 1996, Manuel Jorge Aragoneses, Francisco Jordá Cerdá, Carlos María de Luis y Matilde Escortell.

Na semeya, María Antonia Pedregal, direutora actual del muséu; Pablo León, direutor xeneral de Cultura y Patrimoniu; Marco de la Rasilla, profesor de Prehistoria de la Universidá d'Uviéu; y l'autor Fernández de Córdoba na presentación nel salón d'actos de la instalación.