Los maestros d'asturianu y gallego-asturiano van recibir una guía interactiva con conteníu educativu

|
Aula clase

Educación y Cultura, Política Llingüística y Turismu fixeron a comuña la guía ‘Estoyu d’estímulos y recursos dixitales pa la enseñanza del asturianu’, con versión tamién en gallego-asturiano. El documentu ordena y clasifica centenares de recursos con conteníu educativu y información pa facilitar el llabor a los maestros y maestres.

El portal Educastur va espublizala nos díes próximos en formatu ‘pdf’ y va unviala a tolos profesores de la materia. Éstos van ser los responsables de valorar, escoyer y adaptar aplicaciones didáutiques afayadices pal so alumnáu y la so realidá socioeducativa.

Les guíes clasifiquen los conteníos de forma cenciella, col propósitu de facelos fácilmente localizables. Asina, utilicen categoríes qu'identifiquen cada recursu, asignándolos a una etapa concreta, y describen los sos posibles ámbitos d'aplicación.

Los servicios d'Ordenación Académica y Evaluación Educativa (Conseyería d'Educación) y de Planificación y Conocimientu de la Llingua Asturiana (Conseyería de Cultura, Política Llingüística y Turismu) foron los encargaos d'ellaborar estes ferramientes docentes a lo llargo d'esti cursu. Son 300 recursos nel casu ‘Estoyu d’estímulos y recursos dixitales pa la enseñanza del asturianu’ y 150 nel del 'Estoiro d’estímulos y recursos dixitales prá enseñanza del gallego-asturiano ou eonaviego', que proceden materiales espublizaos pol propiu Gobiernu; por centros de profesores; por docentes; pola Rede de Servicios de Normalización Llingüística; por grupos de trabayu de renovación educativa y ellaboración de materiales dixitales de la Direición Xeneral d'Ordenación, Evaluación y Equidá Educativa; por páxines web d’asociaciones, entidaes privaes o periódicos dixitales que xeneren información abierta al públicu; y por entidaes públiques.

Contador Estadistiques