Los llectores nun ven al país preparáu p’acoyer un númberu altu de turistes nos sos recursos naturales

Un 72 por cientu de los usuarios d’Asturies.com que participó en ‘Conceyu Abiertu’ valora que’l país cuenta con un déficit de xestión y planificación turística. Los baruyos de xente vivíos nos nuesos recursos naturales en Selmana Santa dan bona cuenta d’ello.

La entruga plantegada nesta ocasión yera ‘¿Ta Asturies preparada p’acoyer a un númberu altu de visitantes nos sos recursos naturales como’l que se vivió en Selmana Santa?’, a lo qu’un 72 por cientu señaló ‘Non, hai un déficit de planificación y xestión turística: infraestructures, control, esplotación…’, por un 28 por cientu que consideró que ‘Sí, los problemes que pue haber son puntuales’. Les imáxenes vistes en Selmana Santa na Ruta del Cares o n’otros puntos turísticos del país, con problemes pal aparcamientu o l’accesu y realización de la sienda, dan llugar pal análisis d’un asuntu que se pue agravar entovía más nos años vinientes con un previsible aumentu del númberu de turistes.

Dende esti momentu yá ye posible participar nun ‘Conceyu Abiertu’ nuevu. Tres los ataques a la fauna llocal, con llobos y raposos muertos, les quemes provocaes qu’amburaron estos díes los nuesos montes y la contaminación alta que vive’l país, prestaríanos entrugar a los nuesos llectores si Asturies ye realmente un ‘Paraísu Natural’ o non.