Los llectores d’Asturies.com nun ven na XXXIV Selmana de les Lletres los cambios anunciaos pola conseyera

En xunetu, la conseyera Ana González anunciaba un cambiu de formatu na XXXIV Selmana de les Lletres que principia esti llunes al entender que l’anterior “quedó superáu”. Los usuarios d’Asturies.com nun ven esta modificación per nengún llau.

Según l’avance del programa, al final, el cambiu quedará na ampliación de les actividaes de la XXXIV Selmana de les Lletres, dedicada a Nené Losada Rico, a ámbitos nuevos como’l teatru, la música y la gastronomía. Ello nun supón pal 80 por cientu de los nuesos llectores una modificación necesaria pa dar puxu a esta celebración, como s’esperaba, mentes qu’un 6 por cientu sí considera que significa un pasu alantre. Pela so parte, un 14 por cientu de los usuarios que participaron nel nuesu ‘Conceyu Abiertu’ seleicionó la opción ‘Nun sé’ esperando a conocer meyor el conteníu del programa.

Dende esti mesmu momentu, los llectores d’Asturies.com yá pueden participar nun ‘Conceyu Abiertu’ nuevu. Nesta ocasión queremos saber si van aprovechar el ‘Día del llibru asturianu’ (vienres 3 de mayu) pa mercar un discu o llibru n’asturianu. Nesta xornada estos productos tienen un 10 por cientu de descuentu y vienen acompañaos por un llibru conmemorativu sobre la figura de Nené Losada Rico.