Los llectores d’Asturies.com miren l’usu que se fai del idioma a la hora de mercar un productu o serviciu

Un 84 por cientu de los usuarios d’Asturies.com aseguren que miren l’usu que se fai del asturianu a la hora de mercar un productu o serviciu. La utilización del idioma pue ser un reclamu pal consumidor, como amuesen delles esperiencies.

Tres conocer la intención d’Iniciativa pol Asturianu d’entamar una campaña pa impulsar l’asturianu ente les empreses y el pequeñu comerciu, entrugamos en ‘Conceyu Abiertu’ a los nuesos llectores si teníen en cuenta l’usu que se fai del asturianu a la hora de mercar un productu o contratar un serviciu. Namái un 16 por cientu afirmó que nun ye dalgo no que se fixen, por un 84 por cientu qu’afirmaba lo contario.

L’usu del asturianu por parte d’empreses cuenta con delles esperiencies perpositives, casu del Vinu de Calidá de Cangas Ḷḷumes o de la cerveza artesanal Caleya, con ventes inclusive de fuera del país. Dambos son dos exemplos d’ésitu utilizando l’idioma nel etiquetáu, a lo que tamién ayuda la calidá del productu, y amuesen que l’emplegu de la llingua asturiana nun supón una torga, sinón qu’inclusive amplía l’abanicu de consumidores.

Dende esti momentu, los nuesos llectores pueden participar nun ‘Conceyu Abiertu’ nuevu. Nesta ocasión, tres el nomamientu del arxentín Jorge María Bergoglio como Papa baxo’l nome de Xicu I, queremos saber si-yos presta que, per primer vegada’l, pontífiz sía llatinoamericanu.